Tramp pastaviŭ na paŭzu pastaŭki zbroi Tajvaniu i zrabiŭ zajavy, jakija staviać pad pytańnie hatoŭnaść ZŠA abaraniać jaho

Prezident ZŠA Donald Tramp paśla vizitu ŭ Kitaj pieraściaroh Tajvań ad abviaščeńnia niezaležnaści. Adnačasova kiraŭnik Biełaha doma admoviŭsia dać dakładny adkaz na pytańnie, ci padpiša jon daŭno adkładzieny pakiet amierykanskaj zbroi dla Tajvania, piša Fox News.

U razmovie Tramp padrabiazna raskazaŭ pra svaje pieramovy ź Si Czińpinam i pra toje, što jany mohuć aznačać dla hłabalnaj biaśpieki. Viadučy pacikaviŭsia ŭ prezidenta ZŠA, ci moža narod Tajvania adčuvać siabie ŭ biaśpiecy paśla sustreč Trampa ź Si.

Adkaz Trampa prahučaŭ dvuchsensoŭna i moža być interpretavany jak admova ZŠA ad abarony Tajvania.

«Tajvań dla jaho (Si Czińpina — NN) vielmi važny. Ale heta zaŭsiody było dla ich najvažniejšym pytańniem. I heta nie zachop. Jany prosta nie chočuć, kab hetaje miesca, budziem nazyvać jaho miescam, tamu što nichto nie viedaje, jak jaho vyznačyć, stała niezaležnym. Jany nie chočuć hetaha. I ja dumaju, što jany, imavierna, raspačnuć niešta davoli žorstkaje, tady budzie žorstki adkaz, i adbuducca kiepskija štuki. Tak što nie, reč nie ŭ hetym.

Darečy, učora ŭviečary my ŭsiu noč havaryli pra hetaje pytańnie. Dumaju, ciapier ja viedaju pra Tajvań bolš, čym amal pra lubuju inšuju krainu. Dla jaho (Si Czińpina — NN) heta zaŭsiody było samym važnym, z taho samaha dnia, jak ja ź im paznajomiŭsia šmat hadoŭ tamu. Ja viedaju jaho ŭžo 11—12 hadoŭ. Dla jaho zaŭsiody samym vialikim dasiahnieńniem było pieramahčy.

Što datyčyć mianie, ja nie dumaju, što jany što-niebudź raspačnuć, pakul ja tut. Kali mianie nie budzie, dumaju, jany, mahčyma, niešta raspačnuć, kali ŭsio zastaniecca jak jość. Ale zaraz u ich jość čałaviek (prezident Tajvania Łaj Cinde — NN), jaki choča stać niezaležnym. Što ž, heta ryzykoŭny krok.

Kali vy robiciesia niezaležnymi, jany iduć na heta, tamu što chočuć ustupić u vajnu i ličać, što Złučanyja Štaty ich padtrymajuć. Ja chacieŭ by, kab usio zastavałasia jak jość. I skažu vam voś što, trochi zdymu navinu: ja chacieŭ by, kab usie vytvorcy čypaŭ z Tajvania pierajšli ŭ Amieryku, tamu što, ščyra kažučy, dumaju, heta lepšaje, što možna zrabić. Tamu što situacyja napalenaja, u hetym niama nijakich sumnievaŭ…

Ja pakul nie budu prymać rašeńnie ab pastaŭkach zbroi. Nie, ja pakul ustrymajusia ad hetaha.

I heta zaležyć ad Kitaja. Zaležyć. Ščyra kažučy, heta vielmi dobry kozyr dla nas na pieramovach. Heta šmat zbroi. Heta 12 miljardaŭ dołaraŭ. Heta šmat zbroi.

Ale, viedajecie, kali pahladzieć na šancy, Kitaj — vielmi, vielmi mahutnaja vialikaja kraina.

Heta vielmi maleńki vostraŭ. Tolki padumajcie, jon znachodzicca za 59 mil adtul (ad Kitaja — NN), za 59 mil. A my — za 9500 mil. Heta davoli składanaja zadača…

I ja skažu tak: Tajvaniu było b vielmi razumna krychu supakoicca. Kitaju było b vielmi razumna krychu supakoicca. Im abodvum varta supakoicca».

Takim čynam, Tramp admoviŭsia dać dakładny adkaz adnosna taho, ci padpiša jon daŭno adkładzieny pakiet amierykanskaj zbroi dla Tajvania koštam 14 miljardaŭ dołaraŭ. Choć zakanadaŭcy papiarednie ŭchvalili hety pakiet jašče ŭ minułym hodzie, Bieły dom zatarmaziŭ jaho pryniaćcie.

U vypadku napadu Kitaja na Tajvań, vostraŭ budzie abaraniacca — mahčyma, z toj ža rašučaściu, jak Ukraina ad Rasii. Takaja vajna pryviała b da sankcyj suprać Kitaja. i razbureńnia ciapierašnich handlovych adnosin u śviecie.

• 0
• 0
• 0
• 8
• 2
• 0
• 2
• 0