Vojski pabudavali pantonny most cieraz Prypiać za 6 km ad miažy z Ukrainaj
Spadarožnikavyja zdymki pakazvajuć, što Rasija tolki častkova adviała vajskoŭcaŭ ad miežaŭ Ukrainy, śćviardžaje Maxar. Pryčym na adnym sa zdymkaŭ ź Biełarusi ekśpierty znajšli novy pantonny most praz Prypiać za 6,5 km ad miažy z Ukrainaj.
Spadarožnikavyja zdymki pakazvajuć, što Rasija adviała častku vajskovaj techniki ad miežaŭ Ukrainy, paviedamlaje Reuters sa spasyłkaj na źviestki amierykanskaj kampanii Maxar Technologies, jakaja ciaham niekalkich tydniaŭ adsočvała naroščvańnie kolkaści rasijskich sił. U toj ža čas na spadarožnikavych zdymkach vidać, što ŭ Rasii ŭsio jašče šmat vajskovaj techniki i sił pobač z Ukrainaj, paviedamlaje Reuters.
Pa danych ahienctva, zdymki, jakija śviedčać pra heta, zroblenyja ŭ Biełarusi, u zachodniaj častcy Rasii i ŭ Krymie 14, 15 i 16 lutaha.
Reuters zaznačaje, što nie moža pravieści niezaležnuju acenku pradstaŭlenych kampanijaj zdymkaŭ. U Biełarusi Maxar źniała novy vajskovy pantonny most praz raku Prypiać i novy vialiki palavy špital na adnym z palihonaŭ, paviedamlaje Reuters.
Zdymki, na jakich, jak śćviardžaje Maxar, bačnyja abjekty palavoj vajskovaj infrastruktury i navat časovy pantonny most praz raku Prypiać, apublikavali brytanski telekanał Sky News i indyjski telekanał NDTV.
Palavy špital byŭ uźviedzieny na palihonie Asipovičy ŭ Biełarusi, taksama tam była bačnaja trenirovačnaja aktyŭnaść. Pa słovach analitykaŭ Maxar, na inšym zdymku ź Biełarusi vidać, što na biełaruski aeradrom Ziabraŭka pad Homielem prybyło kala 20 udarnych viertalotaŭ.
Raniej NATO zajaviła, što nie bačyć prykmiet advodu rasijskich vojskaŭ ad miežaŭ Ukrainy, a Kijeŭ aceńvaje kolkaść rasijskich vajskoŭcaŭ kala miežaŭ krainy ŭ 140 tysiač.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary