Deputata Jeŭraparłamienta, jaki rasśledavaŭ złoŭžyvańni Pegasus, samoha ŭzłamali hetaj špijonskaj prahramaj

Pegasus — špijonskaje prahramnaje zabieśpiačeńnie izrailskaj kampanii NSO Group. Jano pradajecca dziaržaŭnym orhanam i aficyjna pryznačana dla rasśledavańnia ciažkich złačynstvaŭ i baraćby z teraryzmam. Adnak rasśledavańnie Pegasus Project, apublikavanaje ŭ 2021 hodzie vydańniem The Guardian razam ź mižnarodnym kansorcyumam žurnalistaŭ, pakazała, što prahrama vykarystoŭvałasia i suprać žurnalistaŭ, pravaabaroncaŭ, palitykaŭ dy inšych pradstaŭnikoŭ hramadzianskaj supolnaści.

Paśla hetaha, u sakaviku 2022 hoda, Jeŭraparłamient stvaryŭ śpiecyjalny kamitet PEGA, jaki pavinien byŭ vyśvietlić maštaby vykarystańnia Pegasus i inšych špijonskich prahram u parušeńnie zakanadaŭstva Jeŭrapiejskaha sajuza.

Stelijas Kułahłu, žurnalist i na toj momant deputat Jeŭraparłamienta ad hrečaskaj partyi Syriza, dałučyŭsia da pracy kamiteta adrazu paśla jaho stvareńnia. Pavodle Citizen Lab, pieršaje zaražeńnie jaho telefona adbyłosia 21 kastryčnika 2022 hoda — prykładna praź siem miesiacaŭ paśla pačatku pracy ŭ Pega.

U toj čas Kułahłu lažaŭ u balnicy paśla płanavaj apieracyi.

Paŭtornaje zaražeńnie telefona było zafiksavana 6 i 7 sakavika 2023 hoda, kali kamitet Pega pracavaŭ nad finalnaj viersijaj spravazdačy Pega. U hetyja dni palityk znachodziŭsia ŭ darozie z Afin u Brusiel.

Choć daśledčykam nie ŭdałosia vyznačyć, jaki mienavita dziaržaŭny klijent vykarystoŭvaŭ Pegasus suprać Kułahłu, jany miarkujuć, što za atakaj stajaŭ toj samy apieratar, jaki raniej sačyŭ za siamiu niezaležnymi žurnalistami i apazicyjnymi aktyvistami z Rasii i Biełarusi, što znachodziacca ŭ Jeŭropie (apaviaščeńnie pra ataku atrymali kiraŭnik kampanii «Jeŭrapiejskaja Biełaruś» Andrej Sańnikaŭ i hałoŭny redaktar «Chartyi-97» Natalla Radzina). Na heta, pavodle Citizen Lab, pakazvaje vykarystańnie padčas atak adnaho i taho ž unikalnaha adrasa Apple ID. Daśledčyki taksama ličać, što hety dziaržaŭny klijent, vierahodna, mieŭ licenzii na vykarystańnie Pegasus u Hrecyi i Bielhii.

Staršy daśledčyk Citizen Lab Džon Skot-Rejłtan nazvaŭ hety vypadak «horkaj ironijaj jeŭrapiejskaha kryzisu sa špijonskim prahramnym zabieśpiačeńniem». Pavodle jaho, čałaviek, jaki rasśledavaŭ vykarystańnie Pegasus, sam staŭ jaho achviaraj, a rekamiendacyi kamiteta Pega paśla hetaha faktyčna byli praihnaravanyja.

Na dumku daśledčyka, kali situacyja nie źmienicca, nastupnymi achviarami mohuć stać inšyja jeŭradeputaty. Jon nie vyklučaje, što ŭžo ciapier niekatoryja parłamientaryi ŭdzielničajuć u hałasavańniach i zakrytych sustrečach, navat nie padazrajučy, što ich telefony pieratvarylisia ŭ pryłady dla špijanažu.

• 0
• 0
• 1
• 0
• 1
• 0
• 1
• 0