Avijacyju čakajuć usio bolš haračyja i vietranyja časy — dla pasažyraŭ mała pryjemnaha

Naprykancy červienia praz navalnicy ŭ łondanskich aeraportach «Chitroŭ» i «Hatvik» byli zatrymanyja kala 900 rejsaŭ (niekatoryja — na 11 hadzin), dziasiatki skasavanyja. Halinovyja ekśpierty miarkujuć, što ŭ budučym padobnyja incydenty buduć adbyvacca čaściej, piša Bi-bi-si.

Pryčyny — u źmienie klimatu. Paciapleńnie ŭzmacniaje kanviektyŭnuju aktyŭnaść (vilhotnaje ciopłaje pavietra padymajecca chutčej, atmaśfiera ŭtrymlivaje bolš vilhaci) — navalnicy mohuć stać čaściejšymi i macniejšymi, asabliva ŭ vysokich šyrotach. 

Vialikabrytanija i Paŭnočnaja Jeŭropa asabliva ŭraźlivyja praz vysokuju ščylnaść pavietranaha ruchu. 

Niepahadź moža zvuzić dastupnuju pavietranuju prastoru, zmušajučy abmiažoŭvać ruch i mianiać maršruty palotaŭ. Kali samaloty nie mohuć ździejśnić pasadku ŭ adnym aeraporcie — naprykład, praz mocny viecier, — ich davodzicca pieranakiroŭvać u inšyja. Heta ciahnie za saboj novyja prablemy: kali ŭ i biez taho zahružany aeraport prybudzie zanadta šmat niezapłanavanych rejsaŭ, jaho infrastruktura moža nie dać rady z absłuhoŭvańniem.

Niezapłanavanyja źmieny maršrutu časta ciahnuć za saboj pavyšany raschod paliva. Vydatki na paliva składajuć značnuju častku vydatkaŭ avijakampanij, tamu rost vydatkaŭ na jaho niepaźbiežna pryviadzie da pavieličeńnia koštu kvitkoŭ dla pasažyraŭ.

Uzmacnieńnie navalničnaj aktyŭnaści, vierahodna, uskładnić kiravańnie pavietranym rucham u rajonach z vysokaj intensiŭnaściu palotaŭ i moža pryvieści da rostu kolkaści zatrymak i admien rejsaŭ.

Kab spraŭlacca ź situacyjaj, novyja sistemy raźliku dystancyi pamiž samalotami pry pasadcy (užo ŭkaranionyja ŭ «Chitroŭ» i «Hatviku») dapamahajuć pavialičyć prapusknuju zdolnaść i skaracić zatrymki.

Paralizoŭvać aeraporty mohuć i mocnyja zalevy (prykład, kali ŭ Dubai ŭ 2024 hodzie było bolš za 1200 skasavanych rejsaŭ).

Turbulentnaść jasnaha nieba — jašče adna źjava, častata jakoj raście z paciapleńniem klimatu. Hetaja źjava — mocnyja pavietranyja patoki na vialikich vyšyniach, jakija ŭźnikajuć pry adsutnaści abłokaŭ ci inšych vizualnych prykmiet, jakija mahli b dapamahčy piłotu paźbiehnuć niebiaśpiečnaj zony. Z 1979 hoda kolkaść padobnych incydentaŭ nad Paŭnočnaj Atłantykaj vyrasła na 55%, i prahnozy abiacajuć dalejšy rost.

Praz padvyšeńnie ŭzroŭniu mora jość taksama doŭhaterminovaja pahroza dla aeraportaŭ, pabudavanych kala ŭźbiarežža. Pavodle acenak, 269 aeraportaŭ śvietu ŭžo pad pahrozaj zatapleńnia, a abarona ad jaho moža kaštavać da 57 miljardaŭ dalaraŭ.

• 0
• 0
• 0
• 0
• 0
• 0
• 0
• 0