Vialikabrytanija pierahladzić pahadnieńnie z Maŭrykijem ab pieradačy archipiełaha Čahas
Vialikabrytanija płanuje pierahledzieć umovy pahadnieńnia z Maŭrykijem ab pieradačy jamu suvierenitetu nad archipiełaham Čahas. Takoje rašeńnie źviazana z krytykaj prezidenta ZŠA Donalda Trampa, jaki znoŭ nazvaŭ damoŭlenaść žachlivaj. Pra heta zajaviŭ ministr abarony Vialikabrytanii Ues Strytynh u efiry Bi-bi-si.
U składzie archipiełaha Čahas u centralnaj častcy Indyjskaha akijana znachodzicca atoł Dyjeha-Harsija. Na im raźmieščanaja brytanskaja vajskovaja baza, jakoj Vialikabrytanija karystajecca sumiesna sa Złučanymi Štatami. Atoł znachodzicca prykładna za 1700 kiłamietraŭ ad paŭdniovaj uskrainy paŭvostrava Indastan, za 3000 kiłamietraŭ ad Afryki i prykładna za 2000 kiłamietraŭ ad Maŭrykija, jaki pretenduje na hetuju terytoryju.
Strytynh zajaviŭ, što vykazvańni Trampa paćviardžajuć: pazicyja amierykanskaha prezidenta adnosna pahadnieńnia ŭ jaho ciapierašnim vyhladzie nie źmianiłasia. Pa słovach ministra, Łondanu nieabchodna pracavać z amierykanskimi sajuźnikami, Trampam i jaho administracyjaj i źmianić damoŭlenaść takim čynam, kab ZŠA mahli jaje ŭchvalić.
Pavodle ciapierašniaha varyjantu pahadnieńnia, Vialikabrytanija pieradała b Maŭrykiju suvierenitet nad archipiełaham, ale ŭziała b atoł Dyjeha-Harsija razam z vajskovaj bazaj u arendu na 99 hadoŭ. Za heta brytanski bok pavinien byŭ by vypłačvać u siarednim 101 miljon funtaŭ sterlinhaŭ, abo kala 134 miljonaŭ dalaraŭ, štohod.
Suprać pieradačy archipiełaha vystupaje nie tolki Donald Tramp, ale i brytanskaja apazicyja. Lidar Kansiervatyŭnaj partyi Kiemi Badenok zaklikała premjer-ministra Endzi Biornema kančatkova admovicca ad pahadnieńnia. Kiraŭnik partyi Reform UK Najdžeł Faradž zajaviŭ, što damoŭlenaść ab Čahasie «miortvaja», i vykazaŭ zadavalnieńnie z hetaj nahody.
Papiaredni brytanski ŭrad na čale z Kiram Starmieram jašče ŭ krasaviku prypyniŭ ratyfikacyju pahadnieńnia ŭ parłamiencie, niepasredna źviazaŭšy heta z supracivam ZŠA.
Kab ratyfikavać damoŭlenaść z Maŭrykijem, Vialikabrytanii nieabchodna razam sa Złučanymi Štatami źmianić brytanska-amierykanskaje pahadnieńnie 1966 hoda ab sumiesnym vykarystańni bazy na Dyjeha-Harsija. Pa słovach Strytynha, padčas pierahladu ŭmovaŭ Łondan budzie imknucca bolš nadziejna harantavać budučyniu vajskovaha abjekta.
U aŭtorak, padčas pieršaj sustrečy z novym brytanskim premjer-ministram Endzi Biornemam, Tramp znoŭ zajaviŭ, što ličyć pahadnieńnie z Maŭrykijem žachlivym i što Vialikabrytanija źbirajecca pierahledzieć jaho ŭmovy. Biornem paćvierdziŭ heta.
Paźniej brytanski premjer zajaviŭ žurnalistam, što prablema dastałasia jamu ŭ spadčynu ad papiaredniaha ŭrada. Pavodle jaho słoŭ, nieabchodna znajści rašeńnie, jakoje dazvolić harantavać budučyniu bazy, važnaj z punktu hledžańnia biaśpieki jak dla Vialikabrytanii, tak i dla ZŠA. Jon taksama skazaŭ, što budzie pracavać nad dasiahnieńniem zhody pamiž usimi zacikaŭlenymi bakami.
Pierad pajezdkaj u Ńju-Jork Biornem pravioŭ razmovu z kiraŭnikom urada Maŭrykija Navinam Ramhułamam. U aficyjnym paviedamleńni brytanskaha boku havaryłasia, što premjer paabiacaŭ razam sa Złučanymi Štatami zrabić usio mahčymaje dla ratyfikacyi pahadnieńnia.
Pry hetym urad Vialikabrytanii pakul nie vyznačyŭ terminaŭ pierahladu i ratyfikacyi damoŭlenaści.
Praciŭniki pieradačy archipiełaha śćviardžajuć, što paśla pierachodu Čahasa pad suvierenitet Maŭrykija tam mohuć raźmiaścicca kitajskija vajskoŭcy. Maŭrykij padtrymlivaje ciesnyja adnosiny z Kitajem.
Rašeńnie ab pieradačy suvierenitetu nad Čahasam lejbaryscki ŭrad Vialikabrytanii pryniaŭ dla vykanańnia rekamiendacyi Mižnarodnaha suda AAN ad 2019 hoda. Maŭrykij, jaki raniej byŭ brytanskaj kałonijaj, na praciahu doŭhaha času damahajecca pieradačy archipiełaha, choć pamiž im i Čahasam bolš za 2000 kiłamietraŭ adkrytaha akijana.
Ciapier čytajuć
Muzyka, malavańnie i tancy ŭ škołach i himnazijach — usio? Što viadoma pra skaračeńni nastaŭnikaŭ-estetystaŭ3
Muzyka, malavańnie i tancy ŭ škołach i himnazijach — usio? Što viadoma pra skaračeńni nastaŭnikaŭ-estetystaŭ
«Kali b ja byŭ śledčym KDB, ja b padkreśliŭ toje samaje». Fiaduta — pra schavanyja sensy «Kałasoŭ pad siarpom tvaim», uvahu siłavikoŭ da svajho rukapisu i zahadku z treciaj častkaj ramana Karatkieviča1212
Kamientary
Nasielnictva tam było nie karannoje, zavieziena z Madahaskara i Tanzanii kakos zdabyvać, jak zavieźli ŭ 19m stahodździ, potym i vyvieźli ŭ 20-m, kali kakos bolš byŭ niepatrebny. A na Maŭrykii nasielnictva spres indusy taksama prybyšy apošnich 150 hadoŭ.
Postkałanijalnyja krainy mohuć vydumlać historyju, jak chočuć. Tolki jeŭrapiejcy nie majuć prava być karennym nasielnictvam anidzie, navat u Jeŭropie.