Biełarusy ź niemaŭlom zhubili pašparty pa darozie ŭ Stambuł

Učora ŭviečary Threads vybuchnuła historyja Alaksandra, jaki vioŭ pramy repartaž z aeraporta Stambuła. Tudy jon prylacieŭ razam z žonkaj, jaje maci i 9‑miesiačnym synam. Užo paśla pasadki vyśvietliłasia, što ŭ mužčyny i niemaŭlaci niama pašpartoŭ, a heta aznačała, što turystaŭ nie mohuć puścić u krainu. Siamja razumieła, što dakumienty zhubilisia niedzie na borcie, ale chutka znajści ich nie atrymałasia. Onliner.by źviazaŭsia z Alaksandram i vyśvietliŭ padrabiaznaści.

«My prylacieli ź Minska ŭ Stambuł. I ŭ samalocie zhubilisia pašparty moj i syna (9 miesiacaŭ), ahlad samalota ničoha nie daŭ (chacia jość padazreńnie, što drenna pahladzieli). Z-za adsutnaści pašpartoŭ nas zaŭtra adpraŭlajuć zvarotnym rejsam dadomu», — napisaŭ pozna ŭviečary ŭ sacsietkach uschvalavany mužčyna.

Karystalniki Threads žvava adreahavali na niaprostuju situacyju i, abapirajučysia na ŭłasny dośvied, stali raić, dzie šukać dakumienty:

— Samyja vidavočnyja varyjanty — ułasnyja rečy i kišeni (pierahledzieć usio ŭvažliva: mahčyma, kurtka, kišenia sumki i h. d.) i ŭ samalocie — kišenia śpinki siadzieńnia.

— Adzin čałaviek pisaŭ, što vypadkova zasunuŭ pašpart u rukaŭ zamiest kišeni. Usialakaje byvaje, praviercie.

— Vy mahli pakinuć pašpart, kali ŭ aeraporcie prachodzili dahlad, kali ŭsie rečy vykładajuć na stužku. U mianie takoje było z dačkoj. A pašpart byŭ u mytnikaŭ — jana pakinuła jaho ŭ łatku.

— Kali laciš u Stambuł, to miascovyja prybiralščycy pieradajuć znojdzienyja rečy ŭ Lost&Found. Ja tak zabyłasia sšytak ź lekcyjaj. Apamiatałasia praz 3 miesiacy. Napisała im list, jany adkazali, što sšytak u ich jość. I ja zabrała jaho, kali znoŭ lacieła ŭ Stambuł.

Usiaho praz paru hadzin paśla publikacyi źjaviŭsia apdejt ad aŭtara pasta.

Vyśvietliłasia, što situacyja vyrašyłasia: «Pašparty znajšli ŭ kišeni śpinki siadzieńnia, dzie siadzieŭ čałaviek. Pradstaŭniki «Biełavija» pieradaduć čałavieku ich zaŭtra. Razychódzimsia».

Žurnalisty źviazalisia z Alaksandram, kab daviedacca padrabiaznaści. Stratu mužčyna, jak i varta było čakać, śpisaŭ na kiepskuju pamiać — takoje moža zdarycca z kožnym.

— Ja išoŭ z sumkami i ź dziciem, napeŭna, pakłaŭ ich tudy (u kišeniu śpinki siadzieńnia), kab vyzvalić ruki, a potym nie pravieryŭ. Uvohule, zvyčajna ja zaŭsiody kładu dakumienty pad zamok, — patłumačyŭ małady baćka.

Adrazu paśla taho, jak vyśvietliłasia, što pašparty zhublenyja, mužčyna zaniaŭsia ich pošukami ŭ aeraporcie Stambuła. Pavodle jaho słoŭ, pierš za ŭsio jon padyšoŭ da stojki «Biełavija».

— Jany telefanavali i prasili pravieryć majo siadzieńnie. Ja dvojčy tudy padychodziŭ: spačatku sam, potym znajšoŭ niejkaha rabotnika aeraporta, jaki siak-tak zrazumieŭ mianie pa-anhlijsku, i taksama padyšoŭ sa mnoj, kab jany pašukali. Na hetaj stojcy kamuści patelefanavali i znoŭ skazali, što ničoha niama, — kaža Alaksandr. — Ja tak razumieju, ich znajšoŭ užo pasažyr, jaki lacieŭ na maim miescy [zvarotnym rejsam], bo nam paviedamili pra znachodku, kali samalot jašče nie prylacieŭ. Patelefanavali ź milicyi. Z avijakampanijaj, padobna, taksama źviazvaŭsia konsuł, ź jakim my na suviazi i jaki nam vielmi dapamahaje.

Siamja praviała noč u śpiecyjalna abstalavanych pamiaškańniach aeraporta — izalatary dla niedapuščanych pasažyraŭ, časovaj zonie dla tych, u kaho ŭźnikli prablemy z dakumientami. Alaksandra adviali ŭ mužčynskaje pamiaškańnie, a jaho žonka ź dziciem i jaje maci znachodzilisia ŭ asobnym.

U pakoi byŭ dziciačy łožačak i navat mahčymaść razasłać kilimok. Pry hetym bahaž pary zabrać nie dazvolili.

Vierahodna, siońnia historyja vyrašycca ščaśliva — i turysty zmohuć prajści pašpartny kantrol.

• 3
• 0
• 0
• 2
• 0
• 0
• 0
• 0