Sieuł atrymaŭ ad Kijeva vybačeńni za razhałošvańnie infarmacyi ab pieradačy vajennapałonnych, ale ŭsio roŭna abiacaje pryniać miery
Bo jany nie apraŭdali čakańni.
Paŭdniovaja Kareja atrymała ad Ukrainy prabačeńni za raskryćcio infarmacyi ab pieradačy Sieułu dvuch paŭnočnakarejskich vajennapałonnych, adnak jany nie apraŭdali čakańniaŭ paŭdniovakarejskaha boku, zajaviŭ ministr zamiežnych spraŭ krainy Čo Chion, piša Bi-bi-si.
Paviedamleńni, jakija ja atrymaŭ [ad kiraŭnika MZS Ukrainy Andreja Sibihi], utrymlivali prabačeńni. Ale jany nie adpaviadajuć tamu ŭzroŭniu, jakoha my čakali, tamu my majem namier pryniać rašučyja miery», — cytuje Chiona ahienctva Yonhap.
Pavodle słoŭ ministra, urad razhladaje roznyja varyjanty dalejšych dziejańniaŭ, u tym liku adklikańnie pasła Paŭdniovaj Karei va Ukrainie Pak Chi Čchana.
Sieuł rezka adreahavaŭ na toje, što Kijeŭ abnarodavaŭ infarmacyju ab pieradačy Paŭdniovaj Karei dvuch paŭnočnakarejskich vajskoŭcaŭ, jakija vajavali na baku Rasii i trapili va ŭkrainski pałon u pačatku minułaha hoda.
Paŭdniovakarejskija ŭłady aścierahajucca, što z-za raskryćcia hetaj infarmacyi siemji vajennapałonnych mohuć stać mišeńniu dla ŭładaŭ KNDR. Asoby abodvuch vajennapałonnych mohuć być ustanoŭleny: paŭdniovakarejskija ŚMI fatahrafavali ich jašče da prybyćcia ŭ krainu.
U piatnicu prezident Paŭdniovaj Karei Li Čže Mion zajaviŭ, što Sieuł prymie «dalejšyja miery», kali Ukraina nie pryniasie publičnych prabačeńniaŭ za adnabakovaje raskryćcio infarmacyi ab pieradačy paŭnočnakarejskich vajennapałonnych.
Pra pieradaču dvuch paŭnočnakarejskich vajskoŭcaŭ Paŭdniovaj Karei prezident Ukrainy Uładzimir Zialenski paviedamiŭ 23 vieraśnia padčas vystupu na Hienieralnaj asamblei AAN.
Daradca Zialenskaha Dźmitryj Litvin kazaŭ, što damoŭlenaści zachoŭvać tajamnicu nie było i «niapravilna było b chavać, kudy nakiroŭvajucca tyja ci inšyja pałonnyja».
Kamientary
a samoha prezika paŭdniova-karejskaha vinavaciać u suviaziach ŭ paŭnočnym susiedam kimam)
Pa zbroi jany z samaha pačatku pisali, što pastaŭlać nie buduć (jak i Japonija) a tolki humanitarnuju dapamohu dajuć.
Kali heta nie palityka sajuźnika, to jak minimum praukrainskaja.
Ale ščyraja ukrainskaja dypłamatyja ŭ jaki raz pakazała svaju savieckuju chamskuju škołu.