Adbyvajucca previentyŭnyja zatrymańni demaktyvistaŭ

16.40. Haradockaha aktyvista kampanii «Havary praŭdu» Leanida Aŭtuchova spynili miascovyja milicyjanty, kali jon išoŭ na aŭtavakzał, kab jechać u Viciebsk. Jamu patłumačyli, što pastupiła apieratyŭnaja infarmacyja pra toje, što jon maje namier uziać udzieł u niesankcyjanavanaj akcyi. U Viciebsk jon źbiraŭsia pajechać, kab uskłaści kvietki da miemaryjalnaj doški ŭ honar Vasila Bykava i da pomnika Uładzimiru Karatkieviču.

Na prypynku hramadskaha transpartu niedaloku ad doma milicyjanty zatrymali Taćcianu Sieviaryniec, maci źniavolenaha ŭ SIZA KDB Paŭła Sieviarynca. Jana taksama mierkavała ŭziać udzieł va ŭskładańni kvietak. Adnak milicyjanty pavieźli jaje ŭ Pieršamajski RAUS, zajaviŭšy, što jana padobnaja «da złačyncy, jakaja ździejśniła sieryju kradziažoŭ u rajonie vulicy Čkałava».

16.26. U Harodni u rajonie vulicy Rejmanta milicyjanty zatrymali aktyvista hramadzianskaj kampanii «Havary praŭdu» Ihara Łamieku (Radyjo Racyja).

16.00. Aktyvista niezarehistravanaha «Maładoha frontu» Juljana Misiukieviča z zaniatkaŭ supracoŭniki milicyi advieźli ŭ Leninski RUUS Minska, dapytać pa nieviadoma jakoj kryminalnaj spravie. Pry hetym jamu ŭručyli pozvu.

15.12. Ryhor Piesiecki paviedamiŭ «Narodnaj Voli», što ludzi ŭ cyvilnym prychodzili na kvateru jaho baćkoŭ i pa miescy prapiski chłopca. Jany kažuć, što jon im patrebny dla niejkaj terminovaj spravy.

14.40 Połackaha aktyvista Viktara Kaleśnika milicyjanty zatrymali, spyniŭšy maršrutku «Połacak-Minsk».

Zatrymańnie adbyłosia ŭ dziesiaci kiłamietrach ad Połacka. Aktyvista pierasadzili u słužbovuju mašynu, nie patłumačyŭšy pryčyn zatrymańnia. Kudy viazuć i navošta, nie paviedamili taksama.

14.20. Lidaraŭ Maładoj Biełarusi zabłakavali va ŭłasnych kvaterach — da Artura Fińkieviča i Nastaśsi Maščavaj sprabujuć uvarvacca milicyjanty, u kvaterach adklučana suviaź i elektryčnaść.

14.07 Jak paviedamilaje radyjo «Svaboda», u kaviarni ŭ HUMie ŭ centry Minska byli

zatrymanyja Franak Viačorka, Pavał Pryvałaŭ z Homielu

i jašče adzin maładzion z Homielu. Zatrymlivaŭ milicyjant Dziemjankoŭ Uładzimier Piatrovič, na padstavie «padabienstva ź ludźmi, jakija ŭčynili złačynstva».

14.00. U Słonimie zatrymany kiraŭnik miascovaj filii niezarehistravanaj partyi «Biełaruskaja chryścijanskaja demakratyja» Barys Kučynski. Jaho schapili prosta ŭ paliklinicy i zaraz viazuć u nieviadomym nakirunku.

Irynu Pčołkinu zatrymali i advieźli ŭ Frunzienski RAUS.

Kala 14 hadzin joj patelefanavali i vyklikali na zdymnaje žytło, dzie raniej byli zatrymany Huminski, Kastusioŭ, Jakuboŭski, Jerusalimskaja. Tam Pčołkinu čakali supracoŭniki milicyi.

13.20. Aktyvisty «Havary praŭdu» Sierhiejenka Alaksandr i Taćciana Łaskaviec zatrymany ŭ kvatery. Supracoŭniki milicyi zvanili ŭ dźviery, zatym niekalki razoŭ stuknuli pa ich, dźviarnaja skrynka adyšła — i jany prakralisia ŭ kvateru. Biez usiakich tłumačeńniaŭ zatrymali aktyvistaŭ i pavieźli ŭ Zavadski RUUS, paviedamlaje zapraudu.info

13.00 Siońnia ranicaj u Homieli zatrymany pradprymalnik, siabra AHP Uładzimir Niapomniaščych. Pra heta paviedamiła žonka pradprymalnika Alena: «Uładzimier vypraviŭsia a šostaj hadzinie na vakzał, kab jechać u Minsk. Ale paśla hetaha jahony mabilny telefon nie adkazvaŭ. I voś tolki zaraz mnie patelefanavali ź milicyi i paviedamili, što muž zatrymany na dvoje sutak i źmieščany ŭ izalatar časovaha ŭtrymańnia na vulicy Mižharodniaj. Čamu i za što — nie skazali».

U 12.00 dva supracoŭniki kryminalnaha vyšuku ŭvarvalisia ŭ kvateru, dzie znachodzilisia 6 čałaviek:

Jak vyśvietliłasia paźniej, Rusłan Kanavałavu ŭdałosia abchitryć milicyjantaŭ — jon pajechaŭ adzin u lifcie ŭniz i vyšaŭ praz pavierch. Śpiecnazaŭcy nie stali jaho šukać.

Rusłan paviedamiŭ, što

pry zatrymańni fizičnaja siła była ŭžyta da Siarhieja Huminskaha i Dźmitryja Jakuboŭskaha.

12.20. Supracoŭniki milicyi zabłakavali kvateru aktyvista «Jeŭrapiejskaj Biełarusi» Maksima Viniarskaha.

12.19. Milicyjanty telefanavali vilejskim demaktyvistam Alaksieju Siudaku (BNF), Uładzimiru Malarčuku (AHP) i inšym. Raspytvali, ci buduć jany ŭdzielničać u akcyjach, prymierkavanych da Dnia Voli.

11.35. Aktyvista «Moładzi BNF» sa Smarhoni Uładzimira Šulžyckaha vyklikajuć 25 sakavika na 16 hadzinaŭ u Smarhonski RAUS. Jon miarkuje, što heta robicca dziela taho, kab jon nie zmoh pajechać na Dzień voli ŭ Minsk. («Jeŭraradyjo»).

11.30. Da siabra AHP z Astraŭca Ivana Kruka siońnia naviedaŭsia ŭčastkovy milicyjant i, pakolki jaho nie było ŭ kvatery, raspytvaŭ žonku ci nie źbirajecca jon jechać u Minsk na śviatkavańnie ŭhodkaŭ BNR. Učastkovy taksama raspytvaŭ susiedziaŭ — ci nie majuć jany pretenzijaŭ da Ivana Kruka, paviedamlaje vialejka.org

11.20. U kvateru na Prytyckaha, 120, jakuju zdymaje aktyvistka «Jeŭrapiejskaj Biełarus» Iryna Pčołkina sprabujuć patrapić milicyjanty. U kvatery znachodziacca taksama aktyvisty Siarhiej Huminski, Andrej Kastusioŭ, Kasia Ijerusalimskaja, Rusłan Kanavałaŭ i Źmicier Jakuboŭski, jaki i paviedamiŭ pra zdareńnie.

U 7.20 milicyjanty prychodzili dadomu da baćkoŭ Taćciany Šapućki. Kazali, što jana im patrebnaja z nahody kryminalnaj spravy, jakoj — nie patłumačyli. Samoj Taćciany doma nie było.

Moładzievy aktyvist AHP Alaksandr Ściepanienka siońnia, a 8 hadzinie byŭ dastaŭleny ŭ RUUS Savieckaha rajona nibyta na prafiłaktyčnuju hutarku. Bolš za dźvie hadziny suviaź ź im adsutničaje.

Kiraŭniku Babrujskaj haradzkoj arhanizacyi AHP Viktaru Buzinavu siońnia rankam nieviadomyja prabili ŭsie čatyry koły va ŭłasnym aŭto. Viktar nieadnojčy prymaŭ udzieł u akcyjach u Minsku.

Jak paviedamlaje pravaabarončy centr Viasna, a 8.00 niekalki milicyjantaŭ sprabavali ŭvarvacca na kvateru da aktyvistki niezarehistravanaha «Maładoha frontu» Hanny Šaruby. Jana admoviłasia adčynić dźviery. Zaraz jany stajać kala padjezda.

Siońnia, a 8 ranicy ŭčastkovy milicyjant pryjšoŭ u dom, dzie pražyvaje pad padpiskaj ab niavyjeździe redaktar sajta Chartyja97 Natalla Radzina.

Supracoŭnik milicyi paraiŭ joj nie pakidać dom, pakolki da jaje pavinien pryjechać śledčy KDB.

9.20 Aktyvista «Havary praŭdu» Leanida Aŭtuchova z Haradka vartuje milicyja.

U 8.20 supracoŭniki kryminalnaha vyšuku ŭ Minsku sprabavali patrapić u kvateru, dzie pražyvaje aktyvist Uładź Vałodzin. Jaho samoha doma nie było. Adnak milicyjanty ŭsio adno karavulać aktyvista pad domam.

U 8.30 kryminalny vyšuk sprabavaŭ uvajści ŭ kvateru aktyvista Aleha Ładućki. Maci dziery nie adčyniaje.

A 7 ranicy milicyjanty prychodzili na kvateru Vincuka Viačorki. Jany šukali jaho syna Franaka.

Pa słovach baćki, Franaka doma nie było.

Na 14.00 žodzinskaha maładafrontaŭca Ramana Vasileviča 25 sakavika vyklikajuć u RAUS.

Jamu dasłali pozvu biez ukazańnia jaje numara i spravy, pa jakoj vyklikajuć. Małady čałaviek ličyć, što takim čynam jamu chočuć pieraškodzić trapić na Dzień Voli ŭ Minsk.

U 7.15 milicyjanty prychodzili ŭ kvateru da baćkoŭ aktyvista «Jeŭrapiejskaj Biełarusi» Paŭła Juchnieviča. Paŭła tam nie było. Paviedamlaje svaboda.org.

Kala 6.30 ranku milicyja pryjechała na kvateru Siarhieja Paŭlukieviča.

Małady čałaviek paśpieŭ adpraić sms-paviedamleńnie.

«Pryjechała milicyja. Zabiraje. Nibyta jość pytańni».

Paviedamleńnie pryjšło ŭ 6.49 ranicy. Na telefanavańni ciapier Siarhiej nie adkazvaje.

Siarhiej Paŭlukievič byŭ udzielnikam Płoščy. Adsiadzieŭ dziesiać sutak administracyjnaha aryštu. U izalatary jaho sprabavali zavierbavać supracoŭniki KDB. Paśla vyzvaleńnia ŭ jaho na kvatery byŭ praviedzieny pieratrus, padčas jakoha zabrali kampjutar. Źjaŭlajecca administratara supołki «My za Vialikuju Biełaruś» na sajcie vkontakte.ru.

Kala 6.30 ludzi ŭ cyvilnym, pradstaviŭšysia kryminalnych vyšukam, sprabavali ŭvarvacca ŭ kvateru, dzie pražyvaje aktyvistka «Jeŭrapiejskaj Biełarusi» Palina Dźjakava. Dziaŭčyna admoviłasia adkryvać im dźviery. Zaraz jany praciahvajuć dziažuryć kala jaje padjezda.

* * *

Dziejačy apazicyi zaklikali ludziej siońnia ŭviečary paśla pracy ŭskłaści kvietki da pomnika Janku Kupału.

Ułady taksama bajacca, što Małady Front arhanizuje šeście «ad Kołasa da Kupały», ad płoščy Jakuba Kołasa da skviera Janki Kupały.

• 0
• 0
• 0
• 0
• 0
• 0
• 0
• 0