Čytać palityčnuju analityku pa situacyi ŭ Biełarusi zrabiłasia nudna.
Mahčyma, heta tolki majo subjektyŭnaje ŭražańnie, ale biełaruskaja palityka zrabiłasia niepapraŭna pradkazalnaj. Čytać palityčnuju analityku pa situacyi ŭ Biełarusi zrabiłasia nudna. Z adnaho boku trajektoryja dalejšaha raźvićcia i tak nie vyklikaje sumnievu, z druhoha — lubyja niečakanaści buduć zaležać ad faktaraŭ, jakija nijakamu analizavańniu nie paddajucca.
Što my majem:
— Ekanamičnaje stanovišča budzie paharšacca. Pierśpiektyvaŭ vypraŭleńnia nie pradbačycca: režym dakazaŭ svaju niazdolnaść da rynkavych reformaŭ na ŭzroŭnie refleksaŭ i mientalnaści.
— Niezadavolenaść nasielnictva Biełarusi budzie pavolna narastać. Apazicyja, raźjadnanaja i demaralizavanaja, budzie nie ŭ stanie hetym karystacca. Abmiežavanuju pierśpiektyvu mohuć mieć tolki stychijnyja pratesty i aktyvizacyja novych, dahetul zbolšaha niepalityzavanych ludziej:hladzi «Revalucyju praz sacyjalnyja siecivy». Niedavolstva vielmi doŭna moža być strymanaje teroram śpiecsłužbaŭ suprać aktyvistaŭ. Čym dalej, tym bolšym budzie niedavolstva, ale jaho da samaha apošniaha momantu možna budzie strymlivać.
— Režym uziaŭ u zakładniki apazicyjnych aktyvistaŭ i lidaraŭ, budzie sprabavać tarhavać imi ŭzamien na ekanamičnuju dapamohu Zachada.
— Adnačasova jon budzie sprabavać najbolš vyhadna pradać bujnyja nacyjanalnyja pradpryjemstvy. Siarod najbolš vierahodnych pakupnikoŭ — rasijcy i kitajcy.
— Ekanamičnaja dapamoha zmoža pieradusim pryjści z Kramla, i pryjdzie jana naŭrad ci raniej za siaredzinu 2012 h., paśla paśpiachovaha skančeńnia rekanfihuracyi tamtejšaj ułady.
Pucin pa sutnaści abvieściŭ pabudovu jeŭrazijskaha intehracyjnaha abjadnańnia lajtmatyvam svajho druhoha prezidenctva, i Biełaruś apynajecca samym lepšym kandydatam, na kim možna papraktykavacca,jak z słavianafilskaha ideałahičnaha punktu hledžańnia, tak i z arhanizacyjnaha: možna ŭjavić sabie, što dapamoha ad Rasii pryjdzie ŭ samy apošni momant, u kroku ad mocnych narodnych chvalavańniaŭ, uzamien na aktyvy i na realnyja kroki pa intehracyi.
Ci budzie Zachad dastatkova i paśpiachova anhažavacca ŭ padtrymku biełaruskaj demakratyi? Ci zmohuć stychijnyja pratesty pieratvarycca ŭ realnuju siłu? Ci budzie režym nadalej procistajać intehracyjanisckim sprobam z Maskvy albo atrymaje adtul «prapanovu, ad jakoj nie zmoža admovicca»? Chto kaža, što viedaje adkazy na hetyja pytańni — tamu nie viercie.
Ciapier čytajuć
Adkul u Biełaruś jedzie bolš za ŭsio hastarbajtaraŭ? Top-20 krain — i Pakistana tut pakul niama2
Kamientary