Złučanyja Štaty apynulisia ŭ pałonie anamalnych marazoŭ i śniehapadaŭ. Maštabny zimovy štorm paralizavaŭ žyćcio ŭ dvuch tracinach krainy. Achviarami niepahadzi stali ŭžo jak minimum 30 čałaviek.
Śpis trahiedyj papaŭniajecca štodnia. Siarod zahinułych — ludzi, jakija trapili pad śniehaŭboračnyja mašyny ŭ Masačusietsie i Ahaja, padletki, što raźbilisia padčas katańnia na sankach u Arkanzasie i Techasie, a taksama achviary abmarožvańnia. Tolki ŭ Ńju-Jorku za vychodnyja na vulicach znajšli cieły vaśmi čałaviek. U Kanzasie palicyja vyjaviła zasypanaje śnieham cieła 28‑hadovaj žančyny, jakaja vyjšła z bara biez palito i telefona.
Enierhietyčny i transpartny paralič
Na viečar paniadziełka bolš za 560 tysiač damoŭ zastavalisia biez elektryčnaści. Najbolš składanaja situacyja skłałasia na poŭdni krainy — u Misisipi i Teniesi, dzie ablivacha abarvała linii elektrapieradač. U mnohich haradach adkryty śpiecyjalnyja punkty abahrevu, bo marazy miescami dasiahajuć —31°C.
Transpartnaja sistema ZŠA taksama pieražyła adzin z samych ciažkich etapaŭ z časoŭ pandemii. Skasavana abo adkładziena bolš za 12 000 avijarejsaŭ. U niadzielu było admieniena 45% usich unutranych rejsaŭ krainy.
Škoły ŭ mnohich štatach zakrytyja albo pieraviedzieny na dystancyjnaje navučańnie.
Ekśpierty prahnazujuć, što straty dla ekanomiki ZŠA składuć niekalki miljardaŭ dalaraŭ. U Misisipi hety ledziany štorm užo nazvali najhoršym z 1994 hoda — pavodle słoŭ miascovych uład, vulicy haradoŭ paśla padzieńnia tysiač dreŭ vyhladajuć tak, «nibyta pa kožnaj prajšoŭsia tarnada».
Kamientary