Moj asabisty štat Ajdacha
Film "Moj asabisty štat Ajdacha" Hasa Van Senta. Zajmaje pačesnaje miesca ŭ sotni filmaŭ, jakija varta pabačyć.
Moj asabisty štat Ajdacha (My Own Private Idaho)
ZŠA, 1991, kalarovy, 102 chv.
Režyser: Has Van Sent
Roli vykonvajuć: Ryver Feniks, Kianu Ryŭz, Kjara Kazeli, Uda Kir, Džejmz Ruso, Ŭiljam Ryčard, Rodni Harvi, Majkł Parkier
Žanr: Drama
Adznaka: 9,5 (z 10)
Dva chłopcy-paluboŭniki, jakija padpracoŭvajuć prastytucyjaj, biez usialakaje mety vandrujuć pa ziamli. Adzin ź ich (Ryver Feniks) – biazdomny, jaki chvareje na raptoŭnyja śnieńni j zhubu prytomnaści, druhi (Kianu Ryŭz) – syn bahataha baćki, uciok z domu na znak pratestu. Nieŭzabavie bunt zavieršycca, ale zakachany siabar pra heta nia viedaje.
Režyser Has Van Sent raspačynaŭ karjeru, jak pradusar telereklamy, adyli pracavaŭ na studyi “masavika” Rodžera Kormena. U stužkach Van Senta televizijnaja klipavaść zakidvaje ŭ narkafantazii j zalimitnyja stany (“Aptečny kaŭboj”), vykštałconaja forma hraje z bulvarnym siužetam (“Pamierci za…”), a ŭ kulturovaje padśviadomaści stailisia adnapołyja žarści (“Błahaja noč”).
“Moj asabisty štat Ajdacha” – liryčny šedeŭr Hasa Van Senta, dzie ŭ śnieńniach lotajuć pavietranyja damy, junaki z pornavokładak, nie sychodziačy z bačynaŭ – dzielacca ŭražańniami, a ŭ sprečki hierojaŭ uplecienyja šekśpiraŭskija piarebrachi Falstafa j prynca Hienry. Ajdacha, Rym, Syetł, eŭrapiejski enfant terrible Uda Kir, chaŭtury baćkoŭ ("statusnaha" j badziažnaha) – kalaž imhnieńniaŭ pamiž narkaleptyčnymi adklučkami j społachi raźvitańnia.
Zamiest postmadernovaj ironii – elehičny sum. Zamiest bulvarnaj historyi – trahiedyja ekzystencyjnaha vandravańnia ŭ formie mas-medyjnaha pastyšu. (U filmie "Džery" vandroŭka nabudzie art-haŭzny vyhlad.) Jość nieba, jość ziamla, jość biesprytulnyja dušy, ahornutyja samotaj, jość śviatło načnoha vohnišča j pieknata darohi pad navisłymi abłokami.
Ryver Feniks i Kianu Ryŭz hrajuć nadryŭna i z zalimitnaju ščyraściu. Dla abodvuch film staŭsia praročym. Paśla stužki Kianu Ryŭz uzmacniŭ svoj status halivudzkaha "syna”, a kinuty Ryver Feniks pamior ad pieradaziroŭki narkotykaŭ.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary