Samy niezvyčajny film Dejvida Linča: TV u subotu
"Prostaja historyja" Dejvida Linča, "Žyćcio Dejvida Hiejła" Ałana Parkiera i "Chroniki Rydyka" Dejvida Tuochi
ZŠA – Niamieččyna, 2003, kalarovy, 130
Režyser: Ałan Parkier
Roli vykonvajuć: Kievin Spejsi, Kievin Ŭinślet, Klea Kinh
Žanr: Drama
Adznaka: 6 (z 10)
Cichmianaha vykładčyka Dejvida Hiejła, pryncypovaha praciŭnika śmiarotnaha pakarańnia, asudzili na śmierć za zabojstva kalažanki. Usie ŭliki byli suprać Hiejła, sud adbyŭsia – nieŭzabavie adbudziecca j pakarańnie.
Reparterka (Kiejt Ŭinślet) paśla sustrečy z Hiejłam, pačynaje sumniavacca ŭ jahonaje vinavataści. Ale ci paśpieje hierainia znajści j abnarodavać dokazy?
Karcina – drama, skiravanaja suprać śmiarotnaha pakarańnia. Cikava, što Kievin Spejsi padčas vykanańnia roli svajho biaźvinnaha hieroja, vykarystoŭvaŭ asobnyja žesty… mańjaka ź filmu “Siem” Dejvida Finčera.
Prostaja historyja (The Straight Story)
ZŠA - Francyja - Vialikabrytanija, 1999, kalarovy, 111 chv.
Režyser: Dejvid Linč
Roli vykonvajuć: Ryčard Fernsŭort, Sisi Spejsiek, Hary Dzin Stentan, Everet Makhił, Džon Farli, Kievin Farli
Žanr: Drama
Samy niezvyčajny film Dejvida Linča. U hetaj karcinie niama hałavałomnych zahadak (“Tvin Piks”, “Małchołand Drajv”); malimonna-histeryčnyja kolery nie kidajucca ŭ vočy (“Błakitny aksamit”, “Dziuna”); hanhsterska-kazačny hvałt nie patrabujecca (“Dzikija sercam”), a prastora karciny dalokaja ad čorna-biełaha ŭrbanistyčnaha kašmaru (“Hałava-namulka”).
Prosta stary amerykaniec jedzie ŭ susiedni štat, kab naviedać svajho chvoraha brata, ź jakim jon nie razmaŭlaŭ dziesiać hadoŭ. Vandravańnie adbyvajecca na minitraktary – praz kukuruznyja pali j pahorki. I heta pałomnictva.
Pa darozie hieroj kajecca vypadkovym minakam, sprabuje dapamahčy maładym i hatuje ježu na vohniščy. Narešcie, hieroj pryjaždžaje da brata – kab prymirycca ź im.
Prostaja historyja – ad niaprostaha režysera.
Taksama na teleekranie:
Chroniki Rydyka (Chroniki Riddika / The Chronicles of Riddick)
ZŠA, 2004, kalarovy, 119 chv.
Režyser: Dejvid Tuochi (David Twohy)
Roli vykonvajuć: Vin Dyzel (Vin Diesel), Kołm Fiory (Colm Feore), Tendzi Ńjutan (Thandie Newton), Džudzi Denč (Judi Dench), Karł Urban (Karl Urban), Aleksa Davałas (Alexa Davalos), Linus Roač (Linus Roache), Joryk van Vahieninhien (Yorick van Wageningen), Nik Čynłund (Nick Chinlund), Kejt Dejvid (Keith David) i inš.
Adznaka 3,5 (z 10)
Žanr: Kaśmičnaje fentazi z elementami žachaŭ
U addalennym pryšłym złyja pasłuhačy śmierci Nekramonhiery źniščajuć cełyja suśviety ci naviartajuć ich u svaju vieru. Adzinaja siła, zdolnaja supraćstajać im – furyjaniec Rydyk (Vin Dyziel), jaki pieravandravaŭ u hety film z fantastyčnaj karciny Tuochi "Čornaja dzirka". Rydyk nie vyłučajecca dobrymi manierami, ale, jak śćviardžaje zdaniepadobnaja praročyca Aeran (Džudzi Denč), "zło vybivajuć jašče bolšym złom".
Nekramonhiery na čale ź "Śviatym paŭmierśniem" Łordam Maršałam to sprabujuć zabić furyjanca – kab praduchilić niebiaśpiečnaje praroctva – to spakušajuć svajoj vieraj, ale samotny hieroj adpraŭlajecca na planetu-turmu Krematoryju, kab vyzvalić kinutuju ŭ papiaredniaj karcinie dziaŭčynu (Aleksa Davałas).
Stužka nahadvaje pravalny film Džona Travołty "Pole bitvy – Ziamla". Jašče ŭ bolšym razdražnieńni buduć amatary "Dziuny" i "Konana-barbara", jakija abvinavaciać Dejvida Tuochi ŭ płahijacie.
Elementy strachaludztva ŭ karcinie bolš samastojnyja: monstrapadobnyja čytalnicy dumak, fijaletavyja mordy palaŭničych za žyvymi, maski, padviešanyja na prutach adepty novaj viery (pryvitańnie "Paŭstałym ź piekła") i vydranaja ź cieła duša. Zmročnaść uzmacniajecca adpaviednym dyzajnam: tatalitarny chram-karabiel śmierci, šeryja armii ŭ łatach, čornaja vypalenaja planeta i muskulistaje cieła Vin Dyzela (nia samaje talenavitaje ŭ śpisie).
Ale fany aktora buduć ad jaho ŭ zachapleńni. Hieroj Vin Dyzela dynamična j vynachodliva bje vorahaŭ siarpom, kułakom, aŭtamatam i kubkam harbaty. A jahonaja nieźniščalnaść zvyšvysokaj tempieraturaj nahadaje radaści razdałbajskaha trešu. Praŭda, stvaralniki karciny vyrašyli nadać hetym radaściam surjozny i epičny maštab.
Kamientary