Hanhstery i Hamlet pa-pucinsku
Hanhsterski komiks “Dzik Trejsi” Ŭorena Bici i “Hrajučy achviaru” Kiryła Siarebranikava
BT, 19.05
Dzik Trejsi (Dick Tracy)
ZŠA, 1990, kalarovy, 107 chv.
Režyser: Ŭoren Bici
Roli vykonvajuć: Ŭoren Bici, Al Pačyna, Madonna, Hleni Hedli, Dastyn Chofman, Poł Sarvina, Džejmz Kaan, Čarli Korsma
Žanr: Hanhsterski komiks pavodle tvoraŭ Čestera Hułda
Adznaka: 7,5 (z 10)
”Oskar” mastaku Ryčardu Siłbertu j dekarataru Ryku Simpsanu.
Niepieramožny detektyŭ Dzik Trejsi zmahajecca z hanhsterami…
Treciaja režyserskaja praca aktora Ŭorena Bici, zroblenaja ŭ stylistycy vostracharakternaha komiksu. Štučnyja atrutnyja kolery, anilinavyja dekaracyi, čyrvonaje, zialonaje j fijaletavaje śviatło ad aperatara Vitoryjo Starary, hratesknyja, defarmavanyja fizijanomii hanhsteraŭ. Ale karcina ździŭlaje nia tolki kalarovaj dramaturhijaj, pryhodnickaj badzioraściu j karykaturnymi maskami.
U prydumanym śviecie komiksu – arhaničnyja j aktory. Al Pačyna – pamfletna-histeryčny nicšeaniec, Ŭoren Bici – mužny j dobry hieroj, i nat śpiavačka Madonna – prajaviła aktorskija vysiłki.
Hodny prykład vydatnaha kinakomiksu.
ANT, 21.35
Hrajučy achviaru (Izobražaja žiertvu)
Rasieja, 2006, kalarovy, 97 chv.
Režyser: Kirył Siarebranikaŭ
Roli vykonvajuć: Jury Čursin, Vital Chajeŭ, Hanna Michałkova, Lija Achiedžakava, Maksim Kanavałaŭ, Andrej Famin, Maryna Hołub, Marat Bašaraŭ
Žanr: “Čornaja” drama pavodle adnajmiennaha tvoru bratoŭ Praśniakovych
Adznaka: 6 (z 10)
Hieroj karciny Valancin padpracoŭvaje, hrajučy achviaru ŭ śledčych eksperymentach. Dušahubstvy raskryvaje charyzmatyčny kapitan (Vital Chajeŭ), a praparščyca Luda (Hanna Michałkova) melanchalična zapisvaje na kameru vyniki eksperymentaŭ. Niedareka zarezaŭ paluboŭnicu ŭ bijaprybiralni, intelihient vykinuŭ žonku z akna, biznesoviec zastraliŭ adnaklaśnika. Ale parad zvyrodztvaŭ, źniatych na chatniaje videa – tolki zasłona dla… hamletaŭskaj historyi.
Hieroju źjaŭlajecca zahibły baćka, maci krucić amury ź dziadźkam, a kachanka-Afelija (jakaja papadušvaje “Hamleta” padčas seksu) – sama na miažy nervovaha zryvu. Ale Hamlety pucinskaj epochi – takija ž pustyja, jak i źfilmavanyja zabojcy.
Hara trupaŭ naprykancy (Šekśpir!), maciukalnicki zryŭ kapitana… i Lija Achiedžakava ŭ kimano. Teatralny režyser Kirył Siarebranikaŭ zrabiŭ fiškaju dramy śledčaje videa, absurd i aktorskija eskapady.
Ale razhubleny čarnušny hratesk žyviejšy za hlamurna-patryjatyčnyja rasiejskija filmy.
Kamientary