Pamior Barys Jelcyn

U paniadziełak pamior pieršy prezydent Rasiei Barys Jelcyn (naradziŭsia ŭ 1931 h.)

Pra heta paviedamiła RIA «Novosti» sa spasyłkaj na pres‑słužbu Kramla.

Jelcyn zajmaŭ pasadu prezydenta Rasiei z 1991 pa 31 śniežnia 1999 h., kali jon niečakana zajaviŭ pra svaju adstaŭku.

Były prezydent SSSR Michaił Harbačoŭ vykazaŭ spačuvańni blizkim Barysa Jelcyna ŭ suviazi ź jahonaj śmierciu.

"Ja vykazvaju samyja hłybokija spačuvańni siamji pamierłaha, za plačyma jakoha vialikija spravy na karyść krainy i surjoznyja pamyłki", - cytuje Harbačova rasiejskaja słužba Bi-Bi-Si.

* * *

Stanisłaŭ Šuškievič: «Jon nikoli nia łajaŭsia matam»

Pieršy kiraŭnik niezaležnaj Biełarusi Stanisłaŭ Šuškievič raźvitvajecca ź pieršym kiraŭnikom Rasiei Barysam Jelcynym.

«Ja smutkuju z hetaj nahody. Maje ŭspaminy pra Barysa Jelcyna samyja śvietłyja. Najpierš heta ŭspaminy pra Viskuli. Jelcyn byŭ pieršym suśvietnym kiraŭnikom, jaki pryznaŭ niezaležnaść Biełarusi. Mnie zaŭsiody było pryjemna kantaktavać z hetym čałaviekam. Praŭda, z hadami, jak by mnie taho nie chaciełasia, znosinaŭ pamiž nami stanaviłasia ŭsio mieniej i mieniej. I Jelcyn, i jahonaja žonka byli nadziva prystojnymi ludźmi, moža być samymi prystojnymi z tych, kaho ja sustrakaŭ u žyćci. U adroźnieńni ad bolšaści kiraŭnikoŭ dziaržavaŭ, Jelcyn absalutna nikoli nie łajaŭsia matam.

Sumniajusia, što ŭ Rasiei niešta źmienicca paśla śmierci Jelcyna. Jahony ŭpłyŭ apošnich hadoŭ byŭ vielmi maleńkim. Mnie zdajecca, što Jelcyn baluča ŭsprymaŭ padziei apošnich hadoŭ u Rasiei. Chacia b toje ž viartańnie savieckaha himnu, Barys Mikałajevič ličyŭ, što savieckaj spadčynie nia miesca ŭ novaj Rasiei.

U adroźnieńni ad svajho nastupnika Jelcyn byŭ sapraŭdnym demakratam, moža časam až zanadta. Ale niahledziačy ni na što ŭ jaho atrymlivałasia trymać balans pamiž centralnaj uładaj i ŭładaj na miescach».

Zapisaŭ Źmicier Pankaviec

* * *

Jak paviedamlaje, Echo Moskvy Barys Jelcyn pamior siońnia ŭ 14:45 pavodle mienskaha času ŭ Centralnaj kliničnaj bolnicy.

Daktary paviedamili, što pryčynaj śmierci stała prahresavańnie sardečna‑sasudzistaj niedastatkovaści. Ale jašče niadaŭna, ničoha nie pradviaščała takoha vyniku. Barys Jelcyn rehularna prachodziŭ planavyja medycynskija abśledavańni, a medyki kazali, što jon znachodzicca ŭ dobraj dla jahonaha ŭzrostu fizyčnaj formie.

Kardyjachirurh Rynat Akčuryn, jaki ŭ 1996 h. rabiŭ Jelcynu aperacyju aorta‑karanarnaha šuntavańnia, skazaŭ, što apošnim časam nie naziraŭ pieršaha prezydenta, ale i padstavaŭ dla hetaha nie było.

Kardyjachirurh zaznačyŭ, što termin žyćcia Jelcyna paśla aperacyi z «medycynskaha hledzišča možna ličyć dobrym vynikam: «Ale kolki b čałaviek nie pražyŭ, strata zaŭsiody sumnaja. I mnie vielmi škada, što adbyłosia».

* * *

Spačuvańni siamji Jelcynych vykazali kiraŭniki i viadomyja asoby roznych krain. Vykazaŭ spačuvańni siamji Jelcynych i U. Pucina i kiraŭnik Biełarusi.

"Pajšoŭ z žyćcia lider nacyi ŭ poŭnym sensie hetaha słova, sapraŭdy patryjot svajoj krainy, vydatny dziaržaŭny dziejač, jaki dušoj chvareŭ za Rasieju i jejny narod. Biełarusy nazaŭsiody zachavajuć ŭ svaich sercach pamiać pra Barysa Mikałajeviča - sapraŭdnaha siabru i vialikaha palityka, ź imiem jakoha źviazany najbolš značnyja i pamiatnyja staronki ŭ raźvićci sajuznych adnosinaŭ pamiž biełaruskim i rasiejskim narodami", zaznačajecca ŭ pasłańni Alaksandra Łukašenki.

• 0
• 0
• 0
• 0
• 0
• 0
• 0
• 0