U Rasii hučny skandał z płastyčnym chirurham ź Biełarusi — jaje statusnaja pacyjentka amal aślepła paśla šarahovaj apieracyi

Kaciaryna Łanskaja naradziłasia i vyrasła ŭ Minsku. Jana skončyła fiłałahičny fakultet BDU, a paśla pajšła ŭ miedycynu. Skončyła Biełaruski dziaržaŭny miedycynski ŭniviersitet, ale praciahnuła navučańnie ŭ Rasii. Tam i zastałasia, zrabiŭšy sabie imia jak płastyčny chirurh. Łanskaja abaraniła kandydackuju dysiertacyju i stała pracavać u maskoŭskaj klinicy «Kłazko».

«Kaciaryna — sapraŭdny prafiesijanał, taktoŭnaja, spahadlivaja, uvažlivaja da kožnaj drobiazi. Paśla taho, jak mnie źniali švy, ja ŭbačyła vynik jak z karcinki! Vierchnija pavieki byli padciahnuty i raskryty, skury, jakaja navisaje, byccam i nie było. Niama efiektu praapieravanaha tvaru, usio nastolki tonka», — pisała adna ź jaje pacyjentak u 2020 hodzie.

Adnak u kastryčniku 2023 hoda da Łanskoj na pryjom pa rekamiendacyi siabrovak trapiła žonka prezidenta Fiederacyi jaŭrejskich abščyn i zasnavalnika Jaŭrejskaha muzieja i centra talerantnaści Alaksandra Barady 46-hadovaja Ina. Joj Łanskaja zrabiła blefarapłastyku — płastyčnuju apieracyju pa vydaleńni lišniaj skury i tłušču z pavieka. Pacyjentcy była zroblena takaja pracedura na vierchnim i nižnim paviekach, a taksama endaskapičny liftynh iłba i brovaŭ.

Jak pisała presa, paśla praviadzieńnia pracedury žančynu pavinny byli vypisać praz dva dni, ale jana prabyła ŭ klinicy tydzień. Uźnikli ŭskładnieńni: pačalisia hałaŭnyja boli, a vočy stała niemahčyma raspluščyć. Nie dapamahli i kropli, jakija prapisali ŭ klinicy. U vyniku ŭ jaje pačałosia adpłastavańnie rahavicy, i jana pačała ślepnuć.

Pavialičyć

Žančynu adpravili na lačeńnie za miažu, dzie daktary zmahli tolki na 30% viarnuć zrok na adnym voku. Śpiecyjalisty havorać, što, mahčyma, dapamahčy Inie zmoža tolki apieracyja pa pierasadcy rahavicy.

U lutym 2024 hoda była zaviedziena kryminalnaja sprava, pa jakoj Łanskaja prachodziła ŭ jakaści śviedki. Ale praź niekatory čas, u śniežni 2024 hoda, sa statusu śviedki jaje pieraviali ŭ status abvinavačanaj, sama chirurh była źmieščana pad chatni aryšt.

U kancy studzienia 2025 hoda Łanskoj vystavili abvinavačańnie pa častcy 2 artykuła 238 Kryminalnaha kodeksa Rasii — «akazańnie pasłuh, jakija nie adpaviadajuć patrabavańniam biaśpieki». Ad jaje patrabujuć kala miljona biełaruskich rubloŭ.

Łanskaja źviarnułasia da Ksienii Sabčak i vykazała svoj punkt hledžańnia.

Viersija Łanskoj

Pa słovach Kaciaryny, hipatetyčna aślepnuć paśla blefarapłastyka možna tolki z-za vielmi redkaha ŭskładnieńnia — retrabulbarnaj hiematomy. Heta kryvaciok, jaki moža zdušyć zrokavy nierv. Adnak paśla blefarapłastyki heta ŭskładnieńnie praktyčna niemahčyma, pakolki pry takich apieracyjach nie pravodziać aniesteziju za vočnym jabłykam, dzie moža ŭźniknuć retrabulbarnaja hiematoma. Kali b jana ŭźnikła, to simptomy byli b vidavočnyja (kryvavaje voka, pašyranaja zrenka, strata reakcyi na śviatło), i taki stan adrazu b zaŭvažyli.

Paśla apieracyi ŭ pacyjentki nazirałasia ŭmieranaje niezmykańnie paviek (ekspazicyjnaja kieratapatyja), što źjaŭlajecca normaj. Takaja prablema moža ŭźnikać z-za acioku abo vykarystańnia stryp-pałosak, jakija fiksujuć švy, što abmiažoŭvaje ruchomaść paviekaŭ. Zvyčajna heta ciaham 2-3 tydniaŭ prachodzić biez surjoznych nastupstvaŭ.

Važnym faktam źjaŭlajecca toje, što za miesiac da taho, jak pryjści na blefarapłastyku, Ina Barada ŭ inšaj klinicy prachodziła lačeńnie ad chalazijona — zachvorvańnie paviekaŭ, jakoje prajaŭlajecca jak puchlina (buhorčyk, zapoŭnieny vadkaściu) na vierchnim abo nižnim pavieku. Stan vielmi padobny da taho, što ŭ narodzie nazyvajuć jačmień.

Łanskaja pryznaje, što nie viedała ab hetym. U advarotnym vypadku, chutčej za ŭsio, apieracyja mahła być pieraniesiena na bolš poźni pieryjad.

Paśla vypiski z kliniki Ina Barada źviarnułasia ŭ kliniku, dzie lačyła chalazijon. Tam joj pastavili dyjahnaz ekspazicyjnaja kieratapatyja, jakuju jana lačyła try tydni, a zatym praciahnuła lačeńnie ŭ Italii.

Padčas adnaho ź pieralotaŭ u žančyny adbyłasia pierfaracyja rahavicy — surjoznaje ŭskładnieńnie, jakoje pahražaje zroku, bo ŭjaŭlaje saboj skrazny defiekt rahavicy. Dla jaho zakryćcia byli praviedzieny niekalki apieracyj roznymi mietadami.

Łanskaja zaŭvažaje, što paśla apieracyj na vačach nie rekamiendujecca latać, bo heta moža pahoršyć situacyju, ale jana nie viedaje, ci papiaredžvali ab hetym Baradu inšyja aftalmołahi.

U vyniku, niahledziačy na toje, što paśla płastyčnaj apieracyi byŭ praviedzieny šerah inšych manipulacyj i apieracyj, usio abvinavačańnie nakiravana na Kaciarynu Łanskuju.

Jak kaža Łanskaja, daktary kliniki nie zhodnyja z vynikami sudova-miedycynskaj ekśpiertyzy. Ekśpierty nie ŭličyli nastupnaje lačeńnie pacyjentki i ihnaravali dakumienty ź inšych miedycynskich ustanoŭ. U jakaści danych dla hetaj ekśpiertyzy była vykarystana acenka stanu zroku na dziaviaty dzień paśla apieracyi. Akramia taho, u ekśpiertyzie paznačany preparaty, jakich nie było ŭ miedycynskaj dakumientacyi.

Adnak klinika ŭžo vypłaciła paciarpiełaj Baradzie sumu roŭnuju kala 350 tysiačam biełaruskich rubloŭ. Pytańnie, čamu «Kłazko» nie zmahła damovicca z paciarpiełaj, kab taja nie vystaŭlała abvinavačańnie doktaru, zastajecca adkrytym. Z 24 lutaha 2025 hoda, pa słovach Łanskoj, jana pracuje ŭ inšaj klinicy i čakaje suda. Na majomaść doktara nakładzieny aryšt.

• 1
• 1
• 2
• 14
• 3
• 4
• 2
• 0