Ціхаакіянская дзяржава Науру вырашыла спаганяць 7 тыс. даляраў візавых збораў з журналістаў, якія жадаюць наведаць выспу, павялічыўшы такім чынам яе кошт у 40 разоў.
Некаторыя назіральнікі выказалі здагадку, што за рашэннем уладаў рэспублікі стаіць Аўстралія, якая хоча абмежаваць доступ СМІ ў аўстралійскі іміграцыйны цэнтр.
Умовы ўтрымання ўцекачоў у Науру неаднаразова падвяргаліся крытыцы з боку ААН і праваабарончых арганізацый.
Урад у Ярэне сцвярджае, што новая пошліна толькі закліканая папоўніць бюджэт астраўной дзяржавы.
Па паведамленнях некаторых СМІ, бюджэт Науру значна прырос расійскімі сродкамі пасля таго, як рэспубліка прызнала незалежнасць Абхазіі і Паўднёвай Асеціі.
Науру — карлікавая дзяржава на аднайменнай каралавай выспе ў заходняй частцы Ціхага акіяна плошчай 21,3 км² і насельніцтвам 11,3 тыс. чалавек. Незалежнасць абвешчана ў 1968 годзе. У сталіцы, горадзе Ярэн, пражывае 1 100 чалавек.
Каментары