Насуперак дыскрымінацыі.
Нарадзіцца жанчынай у Іране — не найлепшы лёс. У краіне не выконваюцца многія правы жанчын, дыскрымінацыя замацаваная на заканадаўчым узроўні. Сітуацыя толькі пагаршаецца. Не самая значная, але самая заўважная знешне праблема жанчын у Іране гэта жорсткі дрэс-код.
Закон абавязвае іранскіх жанчын насіць хіджаб. Супраць хіджабаў яны пратэстуюць у тым ліку віртуальна. Нядаўна СМІ заўважылі інстаграм punkgirlsir. Даволі звыклыя вобразы для еўрапейцаў смяротна небяспечныя ў Іране.
За няправільнае нашэнне хіджабу фанатыкі абліваюць іранскіх жанчын кіслатой. Афіцыйнае пакаранне менш жорсткае: калі адзенне адкрывае нешта акрамя твару і рук — 70 удараў плёткай ці 60 дзён турмы.
Раней вядомай па ўсім свеце стала Facebook-суполка My Stealthy Freedom, дзе іранскія жанчыны публікуюць свае фота з непакрытай галавой. Паказаць твар адважваюцца далёка не ўсе. Магчыма, тыя, хто адважваюцца, ужо і не жывуць у Іране.
Дзяўчыны з punkgirlsir ідуць далей: не толькі не пакрываюць галаву, але і апранаюцца ў такое, за што на вуліцы іх маглі бы і забіць.
Застаецца спадзявацца, што фанатыкі і паліцыя не падпішуцца на гэты акаунт — у адрозненне ад Facebook і Twitter, Instagram у Іране не заблакаваны. Пра тое, на якія інстаграмы з Ірана варта падпісацца, нядаўна пісаў The Guardian.
Каментары