Скандал паміж Люцыяй Лушчык і Ілонай Герашчанка працягваецца: да яго далучылася папулярная расейская блогерка
Скандал, героямі якога сталі бізнэсовец Андрэй Герашчанка, ягоная былая жонка Ілона Герашчанка і новая жонка Люся Лушчык, не толькі не сціхае, а яшчэ і набірае абароты.
Нагадаем, што разам са сваім новым мужам, бізнэсоўцам Андрэем Герашчанкам, Лушчык даволі непрыгожа змагаецца за ягоную дачку.
Як сцвярджае мама гэтай дзяўчынкі, Ілона Герашчанка, яе абмяжоўваюць у магчымасцях бачыцца з дачкой. Больш за тое, Лушчык спрабавала дыскрэдытаваць Ілону ў прысутнасці дзяўчынкі, пра што сведчыла відэа, якое выклала ў сеціва Герашчанка.
Таксама Герашчанка стварыла інтэрнет-петыцыю, пад якой пакінулі подпісы больш за 9 тысяч чалавек. У петыцыі яна спадзявалася, што справа набярэ розгалас і гэта дапаможа вярнуць дачку. Праўда, Вярхоўны суд Беларусі разглядаў справу і пакінуў дачку з бацькам.
Цяпер да скандалу далучылася і папулярная расейская блогерка-тысячніца Алена Міро.
У яе блогу за чатыры дні выйшла ажно два допісы, прысвечаныя гэтай гісторыі. У іх блогерка пляжыць Лушчык, называючы тую «калгасніцай» і «сцярвяцінай», заклікае падпісаць яшчэ адну петыцыю, скіраваную да Рыгора Кісяля, кіраўніка АНТ. Петыцыя патрабуе звальнення Лушчык «за амаральныя паводзіны». На дадзены момант пад ёй падпісаліся больш за 6 тысяч чалавек.
Прычына такой актыўнасці блогеркі простая – яна сама кажа, што сябруе з Ілонай Герашчанка. Пры гэтым блог Міро уваходзіць у лік самых папулярных у Рунэце.
Каментары