Беларусь закрывае сваё пасольства ў Фінляндыі. Адпаведнае рашэнне ўрад прыняў 20 жніўня, вынікае з запісу ў Нацыянальным рэестры прававых актаў. У ім зарэгістравана пастанова Савета міністраў №424 «Аб закрыцці Пасольства Рэспублікі Беларусь у Фінляндскай Рэспубліцы», заўважыла выданне «Позірк».
Сам тэкст пастановы пакуль не апублікаваны, а прэс-служба ўрада афіцыйна пра рашэнне не паведамляла.
Дыпламатычныя адносіны паміж Беларуссю і Фінляндыяй былі ўсталяваныя 26 лютага 1992 года. Фінскае дыпламатычнае прадстаўніцтва ў Мінску пачало працаваць 1 кастрычніка 2010 года як аддзяленне пасольства Фінляндыі ў Літве. Беларускае пасольства ў Хельсінкі дзейнічае з 5 снежня 2011 года.
Беларускае пасольства ў Фінляндыі таксама было акрэдытавана па сумяшчальніцтве ў Даніі. З 2018 да 2024 года паслом быў Аляксей Самасуеў. Новы пасол прызначаны не быў. Цяпер на сайце пасольства ўжо няма інфармацыі пра кантактных асоб.
Пры гэтым фактычна праца дыпламатычнай місіі ўжо была прыпыненая раней. 3 ліпеня 2026 года на сайце пасольства з'явілася паведамленне пра «часовае прыпыненне працы». Прычына не ўдакладнялася. У паведамленні гаварылася, што са жніўня па консульскія пытанні беларусам прапануюць звяртацца ў іншыя беларускія замежныя ўстановы, у тым ліку ў Генеральнае консульства ў Даўгаўпілсе або пасольства ў Стакгольме.
Публікацыі пра гандлёва-эканамічнае супрацоўніцтва Беларусі і Фінляндыі на сайце пасольства спыніліся яшчэ ў 2022 годзе. Пры гэтым захоўваецца інфармацыя пра палітычныя кантакты дзвюх краін, у тым ліку пра ўзаемныя візіты высокага ўзроўню, якія адбываліся да 2021 года.
Фармальна на сайце дыпмісіі адносіны паміж дзвюма дзяржавамі характарызуюцца як заснаваныя на ўзаемнай павазе і ўзаемнай выгадзе, без праблем і супярэчнасцяў. Аднак рэальныя палітычныя адносіны істотна пагоршыліся пасля падзей 2020 года.
Закрыццё пасольства ў Хельсінкі адбываецца ў рамках больш шырокай «аптымізацыі» беларускай дыпламатычнай сеткі. Гэты працэс пачаўся яшчэ ў красавіку 2021 года. Частка беларускіх пасольстваў у Еўропе закрываецца, а некаторыя суседнія краіны пераходзяць пад акрэдытацыю беларускіх паслоў, якія працуюць у іншых дзяржавах.
Пры гэтым паралельна Мінск пашырае сетку генеральных консульстваў у Расіі.
Рыжанкоў паляцеў адпачываць у КНДР
«Белпол» апублікаваў расследаванне пра беларускіх шпіёнаў пад дыппрыкрыццём у Азіі, Афрыцы і Амерыцы. Хто яны? Поўны спіс
Як атрымаць летам шэнген? Чаму беларусам у ім адмаўляюць і дзе атрымаць візу прасцей?
Беларусы цяпер могуць ездзіць на Балі без візаў
Беларусь адкрые пасольства ў М’янме
Цяпер чытаюць
Пра што маўчыць Аляксей Францкевіч, якому Польшча закрыла ўезд на 10 гадоў67
Каментары