Сяргей Брылін стаў галоўным трэнерам зборнай Беларусі па хакеі. Такое рашэнне прыняў выканаўчы камітэт Федэрацыі хакея Рэспублікі Беларусь на пасяджэнні 20 жніўня.
52‑гадовы расійскі спецыяліст будзе сумяшчаць працу ў беларускай зборнай з пасадай галоўнага трэнера мінскага «Дынама». Клуб ён узначаліў 17 ліпеня 2026 года, падпісаўшы кантракт на тры сезоны. Раней прадстаўнікі беларускага хакея адзначалі, што сумяшчэнне пасад галоўнага трэнера мінскага клуба КХЛ і нацыянальнай зборнай ужо давала станоўчы вынік.
Сяргей Брылін мае вялікі досвед працы ў амерыканскім хакеі. Ён правёў 27 гадоў у сістэме клуба НХЛ «Нью-Джэрсі Дэвілз» — спачатку як гулец, а пасля як трэнер. У якасці хакеіста Брылін правёў 13 сезонаў у НХЛ і тройчы выйграваў Кубак Стэнлі — у 1995, 2000 і 2003 гадах.
Пасля завяршэння гульнявой кар'еры ён працаваў у трэнерскім штабе «Нью-Джэрсі Дэвілз», быў кансультантам, асістэнтам у фарм-клубе і асноўнай камандзе. Апошнія чатыры гады Брылін уваходзіў у трэнерскі штаб галоўнай каманды «Дэвілз». У студзені 2024 года яго ўключылі ў Залу славы «Нью-Джэрсі Дэвілз».
Ёсць у Брыліна і досвед выступленняў за зборную Расіі. Ён стаў бронзавым прызёрам чэмпіянату свету 2007 года, а таксама заваёўваў бронзу на маладзёжным чэмпіянаце свету 1994 года і юнацкім чэмпіянаце Еўропы 1992 года. У КХЛ у якасці гульца ён выступаў за СКА і новакузнецкі «Металург».
Цяпер чытаюць
Каледж хацеў засудзіць студэнта і спагнаць з яго 13 тысяч рублёў — але юнак даў адпор сістэме4
Каментары