Мінскі гарадскі суд вынес прысуд па нашумелай «Справе сямнаццаці». Галоўнаму фігуранту, Канстанціну Вілюгу, прызначана пакаранне ў выглядзе 20 гадоў пазбаўлення волі ва ўмовах узмоцненага рэжыму. Былым супрацоўнікам КДБ — Дзмітрыю Вераценскаму — 15 гадоў узмоцненага рэжыму, а Ігару Карыцкаму — 14 гадоў. Канстанцін Дзенісевіч, у мінулым супрацоўнік МУС, атрымаў 14 гадоў ўзмоцненага рэжыму, паведамляе Tut.by.
Дзясяткі чалавек прыйшлі пачуць прысуд — для гэтага загадзя працэс перанеслі ў будынак суда Маскоўскага раёна Мінска. Большасць — родныя абвінавачаных. На ўваходзе ў залу пасяджэнняў некалькі чалавек даглядалі прысутных.
Месяц таму фігуранты выступілі з апошнім словам: шмат хто казаў пра нібыта сфабрыкаванасць справы, а ўзятыя з «доказамі злачынства» — прасілі аб памілаванні Пракурор Алег Буйлянкоў прасіў прызначыць абвінавачаным ад 2 да 20 гадоў пазбаўлення волі. Месяц спатрэбіўся суддзі Сяргею Хрыпачу, каб прыняць рашэнне.
Меркаваны прыбытак злачыннай структуры — 1,7 мільёна даляраў.
Галоўнага фігуранта, Канстанціна Вілюгу, абвінавачвалі ў стварэнні і кіраўніцтве міжнароднай злачыннай арганізацыяй, якая займалася абаротам псіхатропных рэчываў і незаконнай прадпрымальніцкай дзейнасцю са студзеня 2011 года па лістапад 2014-га. Яго ж абвінавачвалі ва ўцягванні ў незаконную дзейнасць іншых грамадзян (астатніх абвінавачаных па справе), сярод якіх — цяпер ужо былыя праваахоўнік Канстанцін Дзенісевіч з МУС, а таксама Дзмітрый Вераценскі і Ігар Карыцкі з КДБ.
Былых супрацоўнікаў КДБ і МУС абвінавачвалі ў арганізацыі хімічных даследаванняў «рэчываў, якія ўздзейнічаюць на цэнтральную нервовую сістэму, у тым ліку асабліва небяспечных псіхатропных», якія прызначаліся для далейшага нелегальнага продажу злачыннай арганізацыяй. Экспертызы праводзіліся ў Дзяржаўным крыміналістычным цэнтры МУС і дапамагалі прадаўцам абыходзіць закон — пазбягаць продажу рэчываў, якія забароненыя ці вось-вось будуць забаронены. Таксама бок абвінавачання лічыў, што супрацоўнікі органаў дзяліліся інфармацыяй пра спосабы барацьбы з наркагандлярамі і аператыўнымі дадзенымі пра крымінальны пераслед канкрэтных асоб (што дапамагала Вілюгу ў барацьбе з «канкурэнтамі» па бізнесе).
На лаве абвінавачаных было 17 чалавек: Канстанцін Вілюга, Дзмітрый Верацеенскі, Ігар Карыцкі, Канстанцін Дзенісевіч, Аліна Церагера, Ірына Семяняка, Яўген Цімохаўцаў, Сяргей Дамашкевіч, Антон Марозаў, Андрэй Працэвіч, Максім Гайдук, Марат Багель, Дзмітрый Гаўрыкаў, Віталь Міхалоўскі, Фёдар Бухавец, Валерый Страбкоў, Фёдар Артамонаў.
Цяпер чытаюць
«На 15 хвілін выключылі святло — божа мой, з Украінай параўналі». Лукашэнка патлумачыў, колькі эканоміць на вулічным асвятленні42
Каментары