Minski haradski sud vynies prysud pa našumiełaj «Spravie siamnaccaci». Hałoŭnamu fihurantu, Kanstancinu Viluhu, pryznačana pakarańnie ŭ vyhladzie 20 hadoŭ pazbaŭleńnia voli va ŭmovach uzmocnienaha režymu. Byłym supracoŭnikam KDB — Dźmitryju Vieracienskamu — 15 hadoŭ uzmocnienaha režymu, a Iharu Karyckamu — 14 hadoŭ. Kanstancin Dzienisievič, u minułym supracoŭnik MUS, atrymaŭ 14 hadoŭ ŭzmocnienaha režymu, paviedamlaje Tut.by.
Dziasiatki čałaviek pryjšli pačuć prysud — dla hetaha zahadzia praces pieranieśli ŭ budynak suda Maskoŭskaha rajona Minska. Bolšaść — rodnyja abvinavačanych. Na ŭvachodzie ŭ zału pasiadžeńniaŭ niekalki čałaviek dahladali prysutnych.
Miesiac tamu fihuranty vystupili z apošnim słovam: šmat chto kazaŭ pra nibyta sfabrykavanaść spravy, a ŭziatyja z «dokazami złačynstva» — prasili ab pamiłavańni Prakuror Aleh Bujlankoŭ prasiŭ pryznačyć abvinavačanym ad 2 da 20 hadoŭ pazbaŭleńnia voli. Miesiac spatrebiŭsia sudździ Siarhieju Chrypaču, kab pryniać rašeńnie.
Mierkavany prybytak złačynnaj struktury — 1,7 miljona dalaraŭ.
Hałoŭnaha fihuranta, Kanstancina Viluhu, abvinavačvali ŭ stvareńni i kiraŭnictvie mižnarodnaj złačynnaj arhanizacyjaj, jakaja zajmałasia abarotam psichatropnych rečyvaŭ i niezakonnaj pradprymalnickaj dziejnaściu sa studzienia 2011 hoda pa listapad 2014-ha. Jaho ž abvinavačvali va ŭciahvańni ŭ niezakonnuju dziejnaść inšych hramadzian (astatnich abvinavačanych pa spravie), siarod jakich — ciapier užo byłyja pravaachoŭnik Kanstancin Dzienisievič z MUS, a taksama Dźmitryj Vieracienski i Ihar Karycki z KDB.
Byłych supracoŭnikaŭ KDB i MUS abvinavačvali ŭ arhanizacyi chimičnych daśledavańniaŭ «rečyvaŭ, jakija ŭździejničajuć na centralnuju niervovuju sistemu, u tym liku asabliva niebiaśpiečnych psichatropnych», jakija pryznačalisia dla dalejšaha nielehalnaha prodažu złačynnaj arhanizacyjaj. Ekśpiertyzy pravodzilisia ŭ Dziaržaŭnym kryminalistyčnym centry MUS i dapamahali pradaŭcam abychodzić zakon — paźbiahać prodažu rečyvaŭ, jakija zabaronienyja ci voś-voś buduć zabaronieny. Taksama bok abvinavačańnia ličyŭ, što supracoŭniki orhanaŭ dzialilisia infarmacyjaj pra sposaby baraćby z narkahandlarami i apieratyŭnymi dadzienymi pra kryminalny pieraśled kankretnych asob (što dapamahała Viluhu ŭ baraćbie z «kankurentami» pa biźniesie).
Na łavie abvinavačanych było 17 čałaviek: Kanstancin Viluha, Dźmitryj Vieraciejenski, Ihar Karycki, Kanstancin Dzienisievič, Alina Cierahiera, Iryna Siemianiaka, Jaŭhien Cimochaŭcaŭ, Siarhiej Damaškievič, Anton Marozaŭ, Andrej Pracevič, Maksim Hajduk, Marat Bahiel, Dźmitryj Haŭrykaŭ, Vital Michałoŭski, Fiodar Buchaviec, Valeryj Strabkoŭ, Fiodar Artamonaŭ.
Siamju ź dziciom nie puścili jeści ŭnutry kaviarni picu navynas. «Haraž» apraŭdvajecca, internet spračajecca4
Siamju ź dziciom nie puścili jeści ŭnutry kaviarni picu navynas. «Haraž» apraŭdvajecca, internet spračajecca
Biełaruskija abrady, arnamienty i biełaruskaja mova paŭsiul. Jak naščadak pierasialencaŭ zrabiŭ siało kala Bajkała znoŭ biełaruskim, i čamu heta moža chutka skončycca1010
Kamientary