На заключнае паседжаньне суду Гомельскага раёну, што адбылося 9 жніўня ў другой палове дня, журналістка-фрылансэрка Ларыса Шчыракова прыйшла зь вязанкай часнаку.
«Гэта каб адпуджваць нячыстую сілу, каб суд разглядаў маю адміністрацыйную справу па законе й справядлівасьці», — патлумачыла Шчыракова часнык на шыі перад абвяшчэньнем прысуду.
Судзьдзя Андрэй Сусла зачытаў матэрыялы справы і тут жа абвясьціў пастанову: прызнаць Шчыракову вінаватай у незаконным вырабе прадукцыі СМІ без акрэдытацыі для польскага тэлеканалу «Белсат» і аштрафаваць на 35 базавых велічыняў — 805 рублёў.
Выкліканыя сьведкі — адна з гераіняў відэасюжэту і супрацоўнік абласной міліцыі, які маніторыў інтэрнэт і ўгледзеў на сайце «Белсату» рэпартаж Шчыраковай — на суд не зьявіліся.
Шчыракова гэтым разам адмовілася ў судзе сьведчыць супраць сябе:
«Практыка паказвае: бараніся не бараніся, гавары не гавары, да якіх нормаў нацыянальнага й міжнароднага права ні зьвяртайся, усё роўна пакараюць. Інтрыга толькі ў тым, на дваццаць базавых аштрафуюць ці на пяцьдзясят. Судзьдзі не самастойныя ў палітычных справах, а мая адміністрацыйная справа — палітычная, заказная. Рашэньні прымаюцца не ў судовых залях, а ва ўладных кабінэтах».
Падтрымаць журналістку ў суд Гомельскага раёну прыехалі некалькі дзясяткаў гараджанаў. Адзін з прысутных прынёс невялікі пульвэрызатар, каб асьвяжыць у залі паветра — таксама ад нячысьцікаў. Іншыя трымалі аркушы паперы з надпісамі: «Не магу маўчаць», «Я зьбіраю й распаўсюджваю інфармацыю, я такі, як Ларыса Шчыракова».
Падставай для цяперашняга перасьледу журналісткі стаў відэасюжэт «Чыноўнікі дазволілі будаваць жыльлё, а цяпер хочуць зьнесьці», зьмешчаны на YouTube і паказаны ў чэрвені на «Белсаце».
Гэта пяты суд над Шчыраковай з пачатку году. Агульная сума штрафаў склала ўжо 3381 рубель. На папярэднім паседжаньні журналістка была ў судзе зь вяровачнай пятлёй на шыі. Тады яна заявіла, што празь міліцыю й суды душаць ня толькі свабоду слова, але й фінансава саміх незалежных журналістаў.
-
Як праходзяць палявыя зборы ў школьнікаў — штурмаваць акопы і разбіраць аўтаматы вучаць і дзяўчат
-
Лукашэнка заклікаў Арменію быць акуратнай. «Каб не паўтарыць тое, што адбылося ва Украіне»
-
Стала вядома пра вызваленне Аляксандра Арановіча — кіроўцы аўтадома «Краіны для жыцця», якога арыштавалі разам з Ціханоўскім
Цяпер чытаюць
Лукашэнка нервова пракаментаваў візіт Ціханоўскай у Кіеў35
Каментары