Былая тэлевядучая АНТ Люцыя Герашчанка стала трэнеркай па ёзе для твару
Пасля нараджэння сына летам 2020 года Люцыя Герашчанка (вядомая многім як Люся Лушчык) максімальна заглыбілася ў сям'ю і новы клопат, захапілася вывучэннем Ведаў і медытацыямі.
Цяпер 42-гадовая тэледзіва вядзе заняткі па ёзе твару. Да гэтага яна прыйшла праз працу вядучай, калі трэба было рабіць артыкуляцыйную размінку перад эфірам.
«На мяне моцна паўплывала вывучэнне Ведаў, заняткі ёгай, медытацыямі, таксама я спяваю мантры, — казала яна ў адным з інтэрв’ю восенню 2020-га. — Некалькі разоў наведвала святыя месцы ў Індыі, напрыклад, была ва Урындаване. Сыходзячы са сваёй філасофіі, напрыклад, разумею, што на дзіця трэба траціць у два разы менш грошай і даваць у два разы больш увагі. І яшчэ ў 100 разоў больш весялосці! Гэта рэцэпт шчаслівых дзяцей. У мяне ёсць магчымасць наняць няню для сына, але я не хачу. Я хачу сама даць дзіцяці ўсё, што магу, падзяліцца сваёй энергіяй і любоўю. Мне здаецца, дзіця павінна само абраць свой шлях у жыцці, бацькі толькі правадыры ў гэтым свеце».
Тэледзіва карыстаецца ведычным календаром Дж'ёціша, каб стрыгчы валасы ў пэўныя дні.
«Раблю для вас пост з гэтымі спрыяльнымі датамі кожны месяц. Больш нічога асаблівага з валасамі не раблю, не фарбую, шампуні-бальзамы самыя звычайныя», — пісала яна.
У яе інстаграме апошні год часта з'яўляюцца пасты з анонсамі заняткаў, а таксама з практыкаваннямі па ёзе твару. Для Люцыі «ёга — гэта не спартыўныя рэкорды, а прыгожы і ўсвядомлены шлях да гармоніі з сабой і са светам».
«Я лічу, што да свайго цела трэба ставіцца беражліва, таму падчас практыкі надаю шмат увагі анатамічнай адбудове і дыханню. Я хачу, каб дзякуючы ёзе вы атрымлівалі не толькі моцнае і гнуткае цела, але і спакойны розум, упэўненасць у сабе і радасць жыць».
Напрыклад, Люцыя расказвае, як візуальна магчыма надтачыць шыю і цалкам прыбраць другі падбародак.
Вядзе заняткі па ёзе твару Люцыя ў YogaStudio. Каштуе поўны курс 490 рублёў, адзін занятак — 75.
Студыя піша ў сацсетках, што «вы навучыцеся захоўваць сваю маладосць і прыгажосць натуральным спосабам, без лішніх укладанняў і з прадказальным вынікам».
У кастрычніку Люцыя ездзіла ў Індыю ў аюрведычную клініку ў Керале. Вось што яна пісала пра адпачынак там:
«Ёга пяць разоў на дзень, пад'ём у пяць раніцы. Ранішні клас ёгі да сняданку і да прыёму алею Гхі (асноўная працэдура Панчакармы).
Хатха-ёга да абеду. Гэта 1,5 гадзіны інтэнсіўнай практыкі.
Наведваць класы па ёзе абавязкова, нават слабачыдлам і тым, хто не выспаўся, не гнецца ці ніколі нічым не займаўся. Адлыньваць хацелі ўсе па розных прычынах. Часцей за ўсё адлыньвалі навічкі раніцай. Але асабіста я адлыньвала ад Карма-ёгі. Мяне проста ламала хадзіць на сажалку і карміць маўклівых рыб рысам.
За мной заходзілі настаўнікі ёгі, праводзілі з пакоя да сажалкі, пакідалі мне талерку з рысам каля сажалкі, каб яна мне на вочы траплялася. Потым правялі прафілактычную размову. Гадзіну расказвалі, навошта ў гэтым жыцці трэба рабіць нешта, за што мне ніколі не скажуць дзякуй. Карацей, я здалася».
Таксама Люцыя расказвае ў сацсетках, што робіць, каб адчуваць сябе шчаслівай.
«Я жыву па некаторых прынцыпах, якія мне дапамагаюць. Напрыклад, кожны дзень адчуваць як мага больш радасці ад самых простых рэчаў і аддаваць яе іншым, дзяліцца.
Гуляю з дзецьмі, размаўляю пра добрыя рэчы з роднымі і сяброўкамі. Ем нармальную ежу. Нармальную — гэта значыць атрыманую без гвалту. Яна дае сілы, а не забірае. Ем шмат малочных прадуктаў. Прынцыпова.
Імкнуся нічога не есці на ноч, не заўсёды атрымліваецца, але іду ў гэтым кірунку. Кладуся рана спаць і рана ўстаю, тут не мая заслуга, гэта таму што дзеці і шматгадовая звычка.
Практыкую ёгу. Часам з іншымі інструктарамі мы пра гэта гаворым: як наогул людзі жывуць без ёгі? Зразумела, што жывуць, але як?! Гэта ж так проста, так даступна — у любыя гады і з любой вагай — найлепшы сродак для добрага самаадчування! І для знешняга выгляду таксама нічога лепш не прыдумана», — дзялілася вядучая.
Чытайце таксама:
«Ведаю, што сустрэну сваё каханне, калі прыйдзе час». Чым цяпер жыве паэт і тэлевядучая Валярына Кустава
Наталля Немагай з АНТ вырашыла асабіста паглядзець, як дэградавала Еўропа ФОТА
«Другі муж чакаў мяне 17 гадоў». Кацярына Ваданосава расказала пра шлюбы, развод, аб'юз і спробу самагубства
Цяпер чытаюць
Наста Базар паступіла на праграму Каліноўскага і хоча стаць сацыялагіняй: «Вучоба пасля 40 гадоў — своеасаблівы эліксір маладосці»53
Каментары