Міргнуць аварыйкай, каб падзякаваць, або фарамі, каб папярэдзіць пра небяспеку, — звыклая справа на беларускіх дарогах. Але адзін і той жа сігнал кіроўцы могуць зразумець па-рознаму. Аўтаінструктар Юрый Красноў расказаў Times.by, як працуе гэтая негалосная мова і чаму нельга слепа ёй давяраць.
«Аварыйка»: падзяка або папярэджанне
Кароткім уключэннем аварыйнай сігналізацыі кіроўцы часта дзякуюць тым, хто прапусціў іх ці дапамог перастроіцца. Таксама ёю могуць паказваць, што з машынай узнікла праблема або кіроўца апынуўся ў складанай сітуацыі.
Красноў лічыць, што звычайна значэнне такога сігналу зразумелае з абставін.
«Дапусцім, ты дапамог кіроўцу перастроіцца, ён паміргаў «аварыйкай» — ты разумееш, што ён сказаў «дзякуй», а не папярэдзіў пра небяспеку, правільна?» — кажа інструктар.
Але магчымы і іншы варыянт: кіроўца пасля перастраення заўважыў перашкоду і ўключыў «аварыйку» менавіта праз яе. Таму ўспрымаць кожнае такое мірганне як падзяку таксама не варта.
Паводле ПДР, аварыйную сігналізацыю выкарыстоўваюць, сярод іншага, пры ДТЗ, вымушаным спыненні на праезнай частцы ці там, дзе спыняцца забаронена, асляпленні фарамі і для папярэджання пра небяспеку. Пры буксіроўцы яе ўключаюць на машыне, якую цягнуць.
Правы паваротнік фуры можа азначаць звычайны паварот
Сярод кіроўцаў, найперш дальнабойнікаў, склалася негалосная дамоўленасць: левы паваротнік машыны наперадзе можа азначаць «не абганяй, небяспечна», а правы — «можаш абганяць».
Аднак гэта не гарантыя, што сустрэчная паласа свабодная. Красноў прыводзіць прыклад: ён ехаў за фурай, якая ўключыла правы паваротнік. Спачатку падумаў, што кіроўца прапануе абагнаць. Але, праверыўшы дарогу, убачыў сустрэчную машыну. Фура ж проста з’ехала на ўзбочыну, а яе кіроўца выйшаў купіць ягады і грыбы.
Здараецца, што людзі яшчэ і блытаюць негалосныя значэнні сігналаў.
Аднойчы, расказвае Красноў, ён тройчы спрабаваў абагнаць машыну на трасе М1. Кожны раз яе кіроўца ўключаў левы паваротнік, і інструктар адмаўляўся ад манеўру. Пазней, каля Мірскага замка, яны пагаварылі.
«Я да яго падышоў і спытаў: «Што ты хацеў паказаць?» Ягоны адказ мяне здзівіў: «Што мяне можна абганяць»», — расказаў Красноў.
Таму перад абгонам трэба самому пераканацца, што дарога свабодная і манеўр бяспечны. Асабліва ўначы, калі цяжэй заўважыць сустрэчны аўтамабіль або зразумець намеры іншага кіроўцы.
Мірганне фарамі не заўсёды азначае «прапускаю»
Кароткімі сігналамі далёкага святла кіроўцы часта паказваюць, што саступаюць дарогу: напрыклад, дазваляюць перастроіцца перад імі. Працяглае ўключэнне далёкага святла Красноў тлумачыць інакш — як спробу прыцягнуць увагу і папярэдзіць: «Пачакай, пакуль я праеду».
Але іншы кіроўца можа не заўважыць міргання або не зразумець яго. Інструктар кажа, што кароткі гукавы сігнал часам хутчэй прыцягвае ўвагу.
Пры гэтым ПДР дазваляюць сігналіць толькі для прадухілення ДТЗ або папярэджання пра намер абагнаць па-за населеным пунктам. Звычайнае запрашэнне перастроіцца асобнай падставай для гукавога сігналу не з’яўляецца.
Калі сустрэчная машына настойліва міргае
Мірганнем фараў кіроўцы папярэджваюць не толькі пра ДАІ.
Наперадзе могуць быць аварыя, перашкода або машына, якая перагарадзіла дарогу за паваротам ці ўзгоркам.
«Калі табе на трасе вельмі настойліва міргае сустрэчны кіроўца, значыць, наперадзе нешта вельмі сур’ёзнае», — тлумачыць Красноў.
У такім выпадку ён раіць знізіць хуткасць і быць гатовым нават спыніцца.
Інструктар таксама звяртае ўвагу на сітуацыі, калі кіроўцы аб’язджаюць аварыю ці зламаную машыну, але не папярэджваюць пра перашкоду тых, хто едзе следам.
«Парада ўсім: калі вы бачыце зламаны аўтамабіль або ДТЗ, перастройвайцеся на свабодную паласу не з уключаным паваротнікам, а з аварыйкай. Таму што калі вы проста ўключыце паваротнік, то кіроўца ззаду падумае, што наперадзе паласа свабодная», — сцвярджае Юрый Красноў.
Што паказваюць рукамі
Жэстамі кіроўцы могуць дзякаваць, вітацца або звяртаць увагу на няспраўнасць. Напрыклад, паказваючы на кола, спрабуюць паведаміць, што яно спушчанае. Далонь, накіраваную ўніз, выкарыстоўваюць як просьбу прытармазіць.
Але не кожную праблему можна растлумачыць на хаду. Паводле Краснова, калі чалавек забыўся выключыць паваротнік, ён можа проста не зразумець жэстаў іншага кіроўцы. Часам прасцей паведаміць пра гэта, калі абедзве машыны спыняцца на святлафоры.
Паднятая рука таксама можа мець розныя значэнні: быць падзякай ці прывітаннем, а ў прадугледжаных ПДР выпадках — сігналам тармажэння.
Негалосныя дамоўленасці не замяняюць правілаў
Красноў лічыць, што раней кіроўцы лепш разумелі адно аднаго. Цяпер, на яго думку, частка аўтамабілістаў не ведае ні негалосных сігналаў, ні саміх ПДР.
Да таго ж дарожныя звычкі могуць захоўвацца нават пасля змены правілаў. У прыклад ён прыводзіць паваротнікі пры ўездзе на кальцавое скрыжаванне. Цяпер ПДР прадугледжваюць, што пры ўездзе на такое скрыжаванне іх не ўключаюць.
Галоўная парада інструктара — правяраць абстаноўку самому. Нават калі здаецца, што сігнал іншага кіроўцы зразумелы.
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну88
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары