«Любы тып зброі масавага паражэння не можа быць абарончым»: дэпутатка Мінгарсавета стварыла петыцыю супраць размяшчэння ядзернай зброі
Стваральніца ініцыятывы «Гэта наш горад» Вольга Цесакова стварыла петыцыю з патрабаваннем не дапусціць захоўвання і размяшчэння на тэрыторыі Беларусі ядзернай зброі. Петыцыю, знойдзеную эколагамі на сайце Petitions.by, можна падпісаць да 10 чэрвеня.
«25 мая 2023 года міністры абароны Беларусі і Расіі падпісалі дакументы аб утрыманні расійскай нестратэгічнай ядзернай зброі ў Беларусі. Гэтыя дзеянні ідуць насуперак з пазіцыяй Рэспублікі Беларусь як дзяржавы без ядзернай зброі і палітыкай у сферы ядзернага раззбраення», — гаворыцца ў петыцыі.
Аўтарка тлумачыць: Беларусь заявіла пра намер зрабіць тэрыторыю краіны бяз'ядзернай зонай яшчэ ў 1990 годзе. Для гэтага ў 1992 годзе мы далучыліся да Дамовы аб нераспаўсюдзе ядзернай зброі як дзяржава, якая не валодае ядзернай зброяй. Наступныя чатыры гады пайшлі на тое, каб вывезці з тэрыторыі нашай краіны ўсю наяўную ядзерную зброю. Гэты працэс быў завершаны ў 1996 годзе з вывазам апошняй боегалоўкі.
У далейшым Беларусь падтрымлівала шматлікія праграмы і ўдзельнічала ў праектах, скіраваных на нераспаўсюд ядзернай зброі: дагавор аб мерах па далейшым скарачэнні і абмежаванні стратэгічных і наступальных узбраенняў, дагавор аб ліквідацыі ракет сярэдняй і меншай далёкасці, дагавор аб усёабдымнай забароне ядзерных выпрабаванняў.
З пачатку станаўлення Беларусі як незалежнай дзяржавы ў нашай Канстытуцыі быў замацаваны статус бяз'ядзернай дзяржавы, то-бок дзяржавы без ядзернай зброі. Аднак пасля рэферэндуму 2022 года гэта палажэнне прыбралі.
— Любы тып ядзернай зброі, як зброі масавага паражэння, не можа быць абарончым, — падкрэслівае Вольга. — Гэта зброя распрацоўвалася як наступальная, прызначаная для ўдару па тэрыторыі ўмоўнага праціўніка, аднак 18-ы артыкул Канстытуцыі выключае ваенную агрэсію з тэрыторыі Рэспублікі Беларусь у дачыненні да іншых дзяржаў.
Акрамя таго, што размяшчэнне расійскай ядзернай зброі ставіць Беларусь у яшчэ больш залежнае ад Расіі становішча, а таксама дае нашу тэрыторыю як месца магчымага вайсковага ўдару, за стварэннем, любымі перавозкамі і захоўваннем ядзерных тэхналогій цягнецца радыяцыйны след (і гэта без уліку патэнцыйнага выкарыстання зброі, як кажуць у экалагічнай арганізацыі Экадом).
Петыцыя патрабуе выключыць выпадкі спекуляцыі пытаннем размяшчэння ядзернай зброі ў Рэспубліцы Беларусь службовымі асобамі, прыняць прававыя нормы, якія захоўваюць статус Рэспублікі Беларусь як дзяржавы без ядзернай зброі і не дапусціць захоўвання і размяшчэння на тэрыторыі Беларусі ядзернага ўзбраення.
Падпісаць яе можна да 10 чэрвеня.
Гурт «Дразды» пакідае сцэну і вінаваціць у гэтым «гіперактыўных блогераў»5
Гурт «Дразды» пакідае сцэну і вінаваціць у гэтым «гіперактыўных блогераў»
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга182182
Каментары