«Адчыніў дзверы і жахнуўся». У лецішча жыхара Баранавічаў ударыла маланка
У жыхара Баранавічаў Віктара Гаўрыльчыка лецішча ў вёсцы Кулікі Ляхавіцкага раёна, учора яму на працу патэлефанавалі суседзі, піша «Наш край».
«Суседзі сказалі, што ў мой дом ударыла маланка. Яны метраў за 300 сядзелі, чакалі аўталаўку і заўважылі, як пасля ўдару пайшоў дымок. Пад'ехалі зірнуць, што там здарылася, убачылі разбітае акно ў летняй кухні, сапсаваны плот і адразу набралі мне, — распавядае Віктар Уладзіміравіч. — Пайшоў дождж. Пажару не адбылося».
Калі гаспадар ужо сам прыбыў на месца, убачыў тры пралёты пашкоджанага плота з сеткі рабіцы. Вонкава дом быў у парадку, але вось што чакала яго ўнутры…
— Адчыніў дзверы і жахнуўся. Усярэдзіне ўсё было развалена. Жудасны пах. Электралічыльнік літаральна разарвала, усю праводку па хаце быццам хтосьці ўзарваў. Усё ўпала на падлогу: крыжы, абразы ляжалі разбітыя на падлозе, нібы нячыстая сіла тут прайшла. Шпалеры сапсаваныя, столь чорная. Цюлі і шторы разарваныя, — пералічвае наступствы стыхіі мужчына. — Я такое бачу ўпершыню, проста жудасць нейкая!
Праводка засталася цэлай толькі ў дзіцячым пакоі (там на падлозе ляжала свяцільня) і ў падвале.
У суседа Віктара Гаўрыльчыка, Мікалая Емяльянавіча, са строю выйшла ўся тэхніка. А ў іншых жыхароў вёскі павыбівала аўтаматы і пробкі. Пацярпелы ад маланкі дом — шчытавы, фінскі, 1974 года пабудовы. Громаадводу паблізу не было, і ўдар прыйшоўся ў большай ступені на веранду і летнюю кухню. Цяпер трэба будзе сур'ёзны рамонт.
— Штогод страхаваў дом, а сёлета неяк забыўся, і вось табе, атрымлівай… На ліквідацыю наступстваў сыдзе каля 6000 рублёў! Плюс да ўсяго ў нас ніхто там не прапісаны, усе памерлі, і гэта было як лецішча. Нават не ўступалі ў спадчыну, хоць прайшло ўжо шмат гадоў. Паралельна трэба і гэтыя працэдуры праходзіць, а ўсё ж платна, — разводзіць рукамі Віктар Уладзіміравіч. — Вядома, самае галоўнае, што нас там не было ў момант удару маланкі, бо, хто яго знае, можа, і я з вамі цяпер бы не размаўляў…
Цяпер чытаюць
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне17
Каментары
@я цябе папужаю, але ты не пужайся@