«Adčyniŭ dźviery i žachnuŭsia». U lecišča žychara Baranavičaŭ udaryła małanka
U žychara Baranavičaŭ Viktara Haŭrylčyka lecišča ŭ vioscy Kuliki Lachavickaha rajona, učora jamu na pracu patelefanavali susiedzi, piša «Naš kraj».
«Susiedzi skazali, što ŭ moj dom udaryła małanka. Jany mietraŭ za 300 siadzieli, čakali aŭtałaŭku i zaŭvažyli, jak paśla ŭdaru pajšoŭ dymok. Padjechali zirnuć, što tam zdaryłasia, ubačyli raźbitaje akno ŭ letniaj kuchni, sapsavany płot i adrazu nabrali mnie, — raspaviadaje Viktar Uładzimiravič. — Pajšoŭ doždž. Pažaru nie adbyłosia».
Kali haspadar užo sam prybyŭ na miesca, ubačyŭ try praloty paškodžanaha płota ź sietki rabicy. Vonkava dom byŭ u paradku, ale voś što čakała jaho ŭnutry…
— Adčyniŭ dźviery i žachnuŭsia. Usiaredzinie ŭsio było razvalena. Žudasny pach. Elektraličylnik litaralna razarvała, usiu pravodku pa chacie byccam chtości ŭzarvaŭ. Usio ŭpała na padłohu: kryžy, abrazy lažali raźbityja na padłozie, niby niačystaja siła tut prajšła. Špalery sapsavanyja, stol čornaja. Ciuli i štory razarvanyja, — pieraličvaje nastupstvy stychii mužčyna. — Ja takoje baču ŭpieršyniu, prosta žudaść niejkaja!
Pravodka zastałasia cełaj tolki ŭ dziciačym pakoi (tam na padłozie lažała śviacilnia) i ŭ padvale.
U susieda Viktara Haŭrylčyka, Mikałaja Jemialjanaviča, sa stroju vyjšła ŭsia technika. A ŭ inšych žycharoŭ vioski pavybivała aŭtamaty i probki. Paciarpieły ad małanki dom — ščytavy, finski, 1974 hoda pabudovy. Hromaadvodu pablizu nie było, i ŭdar pryjšoŭsia ŭ bolšaj stupieni na vierandu i letniuju kuchniu. Ciapier treba budzie surjozny ramont.
— Štohod strachavaŭ dom, a sioleta niejak zabyŭsia, i voś tabie, atrymlivaj… Na likvidacyju nastupstvaŭ sydzie kala 6000 rubloŭ! Plus da ŭsiaho ŭ nas nichto tam nie prapisany, usie pamierli, i heta było jak lecišča. Navat nie ŭstupali ŭ spadčynu, choć prajšło ŭžo šmat hadoŭ. Paralelna treba i hetyja pracedury prachodzić, a ŭsio ž płatna, — razvodzić rukami Viktar Uładzimiravič. — Viadoma, samaje hałoŭnaje, što nas tam nie było ŭ momant udaru małanki, bo, chto jaho znaje, moža, i ja z vami ciapier by nie razmaŭlaŭ…
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie12
Kamientary
@ia ciabie papužaju, ale ty nie pužajsia@