Расія адмовілася ад міжнароднага ўдзелу і міжнародных правіл у расследаванні катастрофы самалёта Прыгожына
Міждзяржаўны авіяцыйны камітэт (МАК) заявіў, што ў цяперашні момант не збіраецца расследаваць крушэнне самалёта Embraer Яўгена Прыгожына паводле міжнародных правіл, піша «Медуза».
Бразільскі цэнтр вывучэння і прадухілення авіяцыйных здарэнняў (CENIPA ) і кампанія Embraer паведамілі, што гатовыя ўзяць удзел у расследаванні прычын крушэння самалёта Прыгожына, калі атрымаюць адпаведнае запрашэнне ад МАК і калі расследаванне будзе праводзіцца паводле міжнародных правіл.
Аднак у МАК, піша Reuters са спасылкай на бразільскія СМІ, адказалі, што не будуць праводзіць расследаванне паводле міжнародных правіл. Самалёт, які разбіўся, выконваў унутраны рэйс, таму расследаванне адносіцца да кампетэнцыі Міждзяржаўнага авіяцыйнага камітэта і будзе праводзіцца паводле яго правіл.
Гэта, як адзначае агенцтва, адпавядае правілам Міжнароднай арганізацыі грамадзянскай авіяцыі (ICAO), паводле якіх рэйс самалёта Прыгожына лічыцца ўнутраным і расследуюць прычыны яго крушэння мясцовыя авіяўлады.
Пры гэтым, піша Reuters, заходнія эксперты адзначаюць, што расследаванне без удзелу бразільскага боку хутчэй за ўсё выкліча сумневы ў яго абʼектыўнасці з улікам таго, што існуюць падазрэнні ў датычнасці ўладаў Расіі да крушэння самалёта.
Самалёт Яўгена Прыгожына Embraer Legacy 600, выраблены бразільскай кампаніяй Embraer, разбіўся ўвечары 23 жніўня ў Цвярской вобласці. Прыгожын і яшчэ дзевяць чалавек, якія знаходзіліся на борце, 27 жніўня былі афіцыйна абʼяўлены загінулымі.
Следчы камітэт Расіі завёў крымінальную справу аб парушэнні правіл бяспекі руху і эксплуатацыі паветранага транспарту. Аднак найбольш распаўсюджанай неафіцыйнай версіяй крушэння самалёта стаў выбух на борце ці праца СПА.
Міждзяржаўны авіяцыйны камітэт быў створаны ў 1991 годзе пасля распаду СССР, тады пагадненне аб яго рабоце падпісалі 12 краін. Станам на жнівень 2023 года ў МАК уваходзяць Азербайджан, Арменія, Беларусь, Казахстан, Кыргызстан, Расія, Таджыкістан, Туркменістан і Узбекістан.
Цяпер чытаюць
Галіна Дзербыш казала пракурору: «Як памру, буду да ўсіх вас ноччу прыходзіць». І жыццё ўжо дагнала яе суддзю і сведак. Гісторыя пенсіянеркі, якой далі 20 гадоў калоніі
Каментары
Аххахаха