«Нагадвае крызіс з Беларуссю». Фінляндыя фіксуе рэзкі рост колькасці нелегальных мігрантаў з Блізкага Усходу на мяжы з Расіяй
Памежная служба Фінляндыі заявіла, што за апошнія два дні ў краіну з боку Расіі нелегальна патрапілі ў 6 разоў больш мігрантаў, чым звычайна фіксуецца за тыдзень. Не выключаецца закрыццё пэўных памежных пераходаў.
Фінскія памежнікі за панядзелак і аўторак агулам зафіксавалі 60 нелегальных перасячэнняў мяжы з боку Расіі. За тыдзень гэтая колькасць звычайна не перавышае 10, перадае газета Financial Times.
«У Фінлядыю нелегальна трапілі мігранты з такіх краін, як Ірак, Сірыя, Емен і Турцыя. Рэзкі рост, хоць і не настолькі высокі, нагадвае міграцыйны крызіс на мяжы Еўрасаюза і Беларусі, блізкага саюзніка Расіі, якая адправіла і адпраўляе тысячы просьбітаў прытулку з Блізкага Усходу і Афрыкі ў Літву, Польшчу і Латвію», — піша Financial Times.
Памежная служба Фінляндыі падкрэслівае, што да нядаўняга часу Расія не дазваляла мігрантам без дакументаў перасякаць мяжу з Фінляндыяй. Краіна вывучала досвед міграцыйнага крызісу на мяжы з Беларуссю і ў найбліжэйшы час афіцыйна раскрые, як будзе змагацца з нелегальнай міграцыяй з боку Расіі.
«Фінляндыя можа накіраваць нелегальных мігрантаў на асобны памежны пераход, а можа знізіць узровень прапускнога трафіку на мяжы. Таксама не выключаны варыянт закрыцця пэўных памежных пераходаў», — адзначае Financial Times.
Афіцыйныя асобы краіны дапускаюць, што рэзкі рост нелегальнай міграцыі звязаны з раптоўным пашкоджаннем газаправоду Balticconnector і падводнага камунікацыйнага кабелю паміж Эстоніяй і Фінляндыяй, у чым падазраюць Расію і Кітай.
Акрамя таго, падобныя паводзіны з боку Расіі маглі быць выкліканыя афіцыйным уступленнем Фінляндыі ў НАТА і яе планамі па размяшчэнні амерыканскіх ваенных баз на тэрыторыі краіны.
Цяпер чытаюць
Палітвязняў па ўсёй краіне апытваюць: пасля памілавання вы хочаце застацца ў Беларусі ці з'язджаць?1
Палітвязняў па ўсёй краіне апытваюць: пасля памілавання вы хочаце застацца ў Беларусі ці з'язджаць?
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3535
Каментары