Брытанія адпраўляе баявыя караблі ў Балтыйскае мора

Вялікабрытанія, рэагуючы на рост напружанасці на Блізкім Усходзе, адправіла свой эсмінец у Персідскі заліў. Акрамя таго, з пачатку снежня марская эскадра пад камандаваннем Вялікабрытаніі пачне патруляваць воды Ла-Манша, Паўночнага і Балтыйскага мораў, ахоўваючы падводныя кабелі, паведамляе Бі-бі-сі.

Міністр абароны Вялікабрытаніі Грант Шэпс у сераду абвясціў, што ў Персідскі заліў і прылеглы рэгіён ідзе эсмінец каралеўскага флоту HMS Diamond. Там ён далучыцца да фрэгата HMS Lancaster і трох мінных тральшчыкаў.

Фрэгат HMS Lancaster і тры мінныя тральшчыкі каралеўскага флоту знаходзяцца ў рэгіёне Персідскага заліва з мінулага года.

«Гэта крытычна важна для Вялікабрытаніі, каб павялічыць нашу прысутнасць у рэгіёне, каб абараніць нашы інтарэсы ва ўсё больш нестабільным свеце», — сказаў Грант Шэпс.

Паводле яго слоў, адпраўка дадатковага карабля стане сігналам для Ірана і яго сатэлітаў у рэгіёне. Хусіты ў Емене і «Хезбала» ў Ліване з пачаткам вайны ў сектары Газа актывізаваліся і спрабуюць наносіць удары па Ізраілю.

ЗША з пачатку вайны адправілі ва ўсходнюю частку Міжземнага мора дзве авіяносныя групы, а ў Чырвоным моры трымаюць эсмінец, які ўжо перахопліваў ракеты і дроны, запушчаныя хусітамі па Ізраілю.

У сярэдзіне лістапада хусіты захапілі ў Чырвоным моры гандлёвае судна MV Galaxy Leader — на той падставе, што адным з саўладальнікаў фірмы, якая валодае суднам, з'яўляецца Ізраільцянін.

У паведамленні Міністэрства абароны Вялікабрытаніі аб адпраўцы HMS Diamond гаворыцца, што карабель дапаможа забяспечыць свабоду мараплаўства і марскога гандлю.

Праз праліў Баб-эль-Мандэб — вузкі ўваход у Чырвонае мора. Штодня праз яго праходзіць каля пяцідзесяці гандлёвых судоў, а праз Армузскі праліў — уваход у Персідскі заліў, ключавы маршрут экспарту нафты — у два разы больш.

Што тычыцца эскадры, якая будзе ахоўваць падводныя камунікацыі, то яна будзе складацца з сямі караблёў, задача якіх — патруляванне вод Ла-Манша, а таксама Паўночнага і Балтыйскага мораў.

Праект задуманы і будзе ажыццяўляцца Аб'яднаным экспедыцыйным корпусам (JEF) пад камандаваннем Вялікабрытаніі, у які таксама ўваходзяць практычна ўсе краіны Паўночнай Еўропы: Данія, Швецыя, Нарвегія, Ісландыя, Фінляндыя, Эстонія, Латвія і Літва.

Грант Шэпс назваў будучую сумесную марскую аперацыю гістарычнай падзеяй.

Ад каго сумесная эскадра будзе абараняць падводныя камунікацыі, брытанскі міністр не сказаў, але і Вялікабрытанія, і іншыя краіны Паўночнай Еўропы ў апошнія гады не раз выказвалі занепакоенасць адносна перасоўванняў расійскіх разведвальных судоў паблізу аб'ектаў інфраструктуры крытычнай важнасці.

У кастрычніку гэтага года ў Балтыйскім моры былі пашкоджаныя падводныя газаправод і кабель паміж Эстоніяй і Фінляндыяй. У гэтым выпадку пад падазрэнне трапіла кітайскае судна Polar Bear, якое магло пашкодзіць трубы якарам.

Падача газу паміж Фінляндыяй і Эстоніяй прыпыненая як мінімум да красавіка наступнага года, заявілі аператары абедзвюх краін.

• 16
• 0
• 1
• 0
• 2
• 0
• 1
• 0