Кіраўніку Эстонскай праваслаўнай царквы МП не працягнулі дазвол на жыхарства
Эстонія не падоўжыць дазволу на жыхарства кіраўніку Эстонскай мітраполіі РПЦ мітрапаліту Яўгенію, вядомаму як Валерый Рашэтнікаў, бо ён нясе пагрозу бяспецы Эстоніі.
Грамадзянін Расійскай Федэрацыі Валерый Рашэтнікаў накіраваў у Дэпартамент паліцыі і памежнай аховы заяву аб працягу дазволу на жыхарства, які Дэпартамент паліцыі і памежнай аховы не падоўжыў. Тэрмін заканчэння дзейнага тэрміновага дазволу на жыхарства мінае 6 лютага, піша Postimees.ee.
«Дзяржава прыняла рашэнне адмовіць у прадаўжэнні дазволу на жыхарства, бо Рашэтнікаў у сваёй публічнай дзейнасці, у тым ліку ў публічных выступах, падтрымлівае дзеянні агрэсара і не змяніў сваю лінію паводзін, нягледзячы на папярэджанні, якія рабіліся яму раней», — растлумачыў кіраўнік бюро пагранічнай аховы Пых'яскай прэфектуры Індрэк Ару.
У тым ліку прадстаўнікі Міністэрства ўнутраных спраў неаднаразова праводзілі гутаркі з Рашэтнікавым і патлумачылі яму, што варта спыніць апраўданне ваенных дзеянняў Расіі і крамлёўскага рэжыму ў публічнай дзейнасці. Нягледзячы на зробленыя раней папярэджанні, Рашэтнікаў не змяніў рыторыку, неадпаведную каштоўнасцям і неадпаведную прававому полю Эстоніі. Таму прызнана, што Рашэтнікаў нясе пагрозу бяспецы дзяржавы.
***
Эстонскія праваслаўныя падзеленыя на дзве часткі. Рускіх па паходжанні і аб'ядноўвае самакіраваная Эстонская праваслаўная царква ў юрысдыкцыі Маскоўскага патрыярхата. Паведамлялася, што яна аб'ядноўвае 37 прыходаў (каля 150 тысяч чалавек), 43 святароў і 17 дыяканаў.
У 1996 годзе аднавілася Эстонская апостальская праваслаўная царква ў юрысдыкцыі Канстанцінопальскага патрыярхата. Яна налічвае каля 27 тысяч чалавек (пераважна этнічных эстонцаў) і 64 духоўных асобаў.
Каментары