«Паехала да былога мужа па аліменты, а пасадзілі за шпіянаж». Гісторыя яшчэ адной украінкі, якую асудзілі ў Беларусі
Сярод зваротаў у КДБ, якія выклалі ў сеціве «Кіберпартызаны», стала вядома пра гісторыю яшчэ адной украінкі, якую ў Беларусі асудзілі за разведную дзейнасць, піша «Радыё Свабода».
У жніўні 2023 года дзве сястры, грамадзянкі Украіны, паехалі ў Беларусь у сямейных справах. Адна з іх адседзела ў следчым ізалятары 5 месяцаў і змагла вярнуцца ва Украіну, а другую асудзілі на 3 гады зняволення за нібыта разведную дзейнасць на карысць Украіны. Радыё Свабода мае іх рэальныя імёны, але ў публікацыі іх змянілі ў мэтах іхнай бяспекі.
Абедзве ўкраінкі — жыхаркі Чарнігава. Улетку 2023 года яны паехалі ў Беларусь разам са сваімі дзецьмі. У адной з іх колішні муж — беларус, і яна хацела забраць у яго аліменты на чатырнаццацігадовага сына.
Іх абедзвюх затрымалі з-за падазрэння ў разведнай дзейнасці на карысць Украіны. У тэлефоне знайшлі здымак вайсковай тэхнікі, які зрабіў яе сын.
У КДБ Беларусі звярнуўся Мікола П., каб высветліць падставы затрымання сваёй жонкі Кацярыны П., якая суправаджала сваю сястру ў паездцы.
«Так, я звяртаўся. Мая жонка ўжо дома, але яе сапраўды затрымлівалі. Ёй інкрымінавалі разведную дзейнасць, шпіянаж. Яна пяць месяцаў сядзела ў ізалятары, але потым яе вызвалілі, нават не ведаю, як гэта адбылося. Бо я ж туды не мог паехаць — жонцы казалі, што калі прыедзе муж, то яго дакладна пасадзім», — сказаў Свабодзе Мікола П.
А сястра Кацярыны, дадаў Мікола П., і цяпер сядзіць. «Знайшлі нібыта нейкі здымак у сына, яна з сынам ехала. У яе колішні муж — беларус і не выплачваў аліментаў, і яны паехалі разбірацца, а іх там затрымалі. А малы ўзяў і сфоткаў нейкую вайсковую тэхніку, і за гэта пасадзілі маці. Далі ёй тры гады», — патлумачыў украінец.
Паводле яго слоў, яны ехалі ў Гомель, але іх затрымалі неўзабаве пасля перасячэння мяжы. «Сястра Кацярыны сядзела ў ізалятары, а цяпер ужо перавялі на турму. З улікам таго, што адседзела ў ізалятары, лічыцца, што яна ўжо адседзела там адзін год», — паведаміў Мікола П.
«Дзяцей мы змаглі вярнуць. Яе сыну цяпер 14 гадоў, а майму 15, яны былі разам і змаглі выехаць. Іх там не кантралявалі, і мы папрасілі знаёмых ім дапамагчы вярнуцца дадому», — адзначыў украінец.
З пачатку расійскага ваеннага ўварвання, якое падтрымаў Аляксандр Лукашэнка і вайсковае кіраўніцтва Беларусі, на беларускай тэрыторыі перыядычна затрымлівалі грамадзян Украіны і судзілі за шпіянаж, агентурную ці разведную дзейнасць. Агульная колькасць асуджаных у Беларусі грамадзян Украіны невядомая.
Мастака Івана Вярбіцкага зноў будуць судзіць за «злоснае непадпарадкаванне адміністрацыі калоніі»
Суддзя, якая выносіла прысуд Ціханоўскаму, прасілася вярнуцца на працу ў КДБ. Але яе не ўзялі
Глыбоцкага бодзібілдара Шарабайку зноў будуць судзіць
Стала вядома, з-за чыйго даносу апынулася за кратамі 75-гадовая бабруйчанка
Маладую маці-адзіночку судзяць па трох палітычных артыкулах. Мінімальнае пакаранне — 4 гады калоніі
Хто той неадэкватны беларус, які ляснуў дзіцятка галавой аб падлогу ў маскоўскім Шарамеццеве8
Каментары
И я не только про этих женщин из статьи, я вообще о жизни.