Новая нейрасетка лакалізуе чалавека ці яго дом па фота знутры кватэры за секунды

Тэхналогіі аналізу выяваў дасягнулі новага ўзроўню. GeoSpy — гэта магутны інструмент на аснове штучнага інтэлекту, які можа вызначыць месца знаходжання чалавека ці яго дома па адным фота (нават калі фота зроблена ў памяшканні, але на ім бачнае хаця б адно незавешанае акно).

Як гэта працуе? GeoSpy навучаны на мільёнах выяў з розных куткоў свету. Ён распазнае архітэктурныя асаблівасці, тып глебы, расліны і іх прасторавае размяшчэнне. Інструмент таксама аналізуе цені, будынкі, адлегласць паміж імі і ўсе іншыя магчымыя арыенціры, каб з фантастычнай дакладнасцю ідэнтыфікаваць месца здымкі.

Нягледзячы на тое, што сацсеткі выдаляюць метаданыя (уключаючы GPS-каардынаты) з фотаздымкаў, GeoSpy не мае ў іх патрэбы, піша выданне 404 Media.

Калі раней для такіх даследаванняў патрабаваліся тыдні, месяцы ці нават гады досведу ў сферы OSINT (выведкі на аснове адкрытых крыніц інфармацыі), то GeoSpy дае такія ж вынікі за некалькі секунд нават недасведчаным карыстальнікам.

Распрацоўшчык GeoSpy, амерыканская кампанія Graylark Technologies, заяўляе, што тэхналогія прызначаная для выкарыстання выключна ўрадавымі і праваахоўнымі структурамі. Аднак высветлілася, што на працягу некалькіх месяцаў інструмент быў даступны і для звычайных карыстальнікаў.

Больш за тое, у сацыяльных сетках з’явіліся відэа, дзе шматлікія карыстальнікі дзеляцца сваімі ўражаннямі ад магчымасцяў GeoSpy. Некаторыя прызналіся, што карысталіся праграмай для сачэння за жанчынамі, адзначае 404 Media.

Сама кампанія Graylark Technologies сцвярджае, што адмаўляла запыты на адсочванне пэўных людзей, асабліва жанчын. Але пасля нядаўняй публікацыі 404 Media ШІ-інструмент GeoSpy стаў недаступны для шырокай публікі.

Пытанне выкарыстання такіх тэхналогій выклікае сур’ёзную дыскусію. З аднаго боку, GeoSpy можа быць карысным для ўрадавых структур у пошуку зніклых людзей або расследаванні злачынстваў. Але з другога — адкрыты доступ да такой сістэмы стварае істотныя пагрозы прыватнасці і бяспецы звычайных грамадзян. Асаблівую занепакоенасць выклікае тое, што такія інструменты могуць трапіць у рукі кіберзлачынцаў ці спецслужбаў аўтарытарных краін.

Пакуль GeoSpy застаецца закрытым для публікі, але сам факт існавання такіх тэхналогій сведчыць пра новую рэальнасць, дзе ананімнасць у інтэрнэце перастае існаваць. А ці зможа грамадства супрацьстаяць гэтаму выкліку — пытанне адкрытае.

• 1
• 0
• 1
• 6
• 14
• 1
• 4
• 0