Больш ніякіх ружовых касцюмаў. Стыль Наталлі Пяткевіч змяніўся кардынальна
Першая намесніца кіраўніка Адміністрацыі Лукашэнкі Наталля Пяткевіч на публіцы часта з'яўляецца ва ўсім чорным і любіць насіць банты. Стылістка Ганна Прышывалка разбірае яе вобразы і тлумачыць, чым яны адрозніваюцца ад тых, што Пяткевіч насіла падчас працы з Лукашэнкам у «нулявыя».
Вобразы Наталлі Пяткевіч у пачатку «нулявых» моцна адрозніваюцца ад тых, якія яна абірае цяпер. Гаворка пра трэндавасць ужо не ідзе.
«Я не адразу зразумела, што гэта адна і тая ж жанчына — настолькі моцна ў яе змяніўся твар. Ад той мяккай і элегантнай жанчыны ў «нулявыя» амаль нічога не засталося. Гэта вельмі дзіўна.
На старых фота яна выглядае прыгожай, яскравай, дагледжанай жанчынай, якой падабаецца яе жыццё.
У яе там сапраўды дарагія і якасныя рэчы, нават сумка «Біркін» (хаця гэта можа быць падробкай). Бачна, што там усё падабрана з густам, пасуе ёй», — каментуе Ганна Прышывалка.
Цяпер Наталля Пяткевіч, на думку стылісткі, абірае адзенне, бліжэйшае да беларускіх чыноўніц, і падбіраецца да стылю старшыні Савета Рэспублікі Наталлі Качанавай і экс-старшыні ЦВК Лідзіі Ярмошынай. Але вобразы Наталлі Пяткевіч асабліва вылучаюцца маскуліннасцю.
«Калі знаходзішся ў нейкім асяроддзі, мімаволі пачынаеш злівацца з ім, гуляць па іх правілах, — кажа Ганна. — Яна на сто адсоткаў адпавядае ўяўленням аб тым, як у Беларусі павінна выглядаць жанчына ў статусе. Цяпер ёсць агрэсія, безвыходнасць, ваяўнічасць. Магчыма, змяніўся яе фінансавы стан, таму што ўжо гаворкі пра дарагія рэчы не ідзе. Раней ёй было вельмі важна, як яна выглядае. Цяпер таксама, але яна згубіла пачуццё свайго ўласнага стылю».
Сярод няўдалых вобразаў Пяткевіч стылістка называе фіялетавую спадніцу і рознакаляровую кашулю.
Удалы ж — у блакітным жакеце.
У гардэробе чыноўніцы шмат рэчаў чорнага колеру, любіць Пяткевіч і блузы з бантамі.
«Не ведаю, ці робіць яна гэта спецыяльна, але чорны працуе як умацаванне яе сацыяльнай пазіцыі «ваяра», яна ваюе, абараняецца, замацоўвае маскуліннасць.
Так апраналіся жанчыны ў 1980-1990-я, у пачатку развалу Саюза, асабліва пра гэта сведчаць банты на яе шыі і вобраз у сарафане з белай кашуляй.
У сувязі з тым, што я шмат працую з людзьмі, ведаю, наколькі наша самаадчуванне адлюстроўваецца ў тым, як апранаемся. Мне здаецца, што ў гэтай жанчыны моцна змяніўся ўнутраны стан, яна згубіла мэту ў гэтым свеце», — мяркуе стылістка.
Разам з тым пасля свайго вяртання Пяткевіч стала адной з самых уплывовых чыноўніц пры Лукашэнку. Яна гладка правяла кампанію па яго «пераабранні». А муж Пяткевіч — прадстаўнік Беларусі пры ААН Валянцін Рыбакоў, які ўдзельнічаў у арганізацыі перамоваў з амерыканцамі па палітвязнях, — можа пацясніць Максіма Рыжанкова на пасадзе міністра замежных спраў.
Хочаце і далей заставацца ў курсе беларускіх падзей? Вы можаце падтрымаць «Нашу Ніву» праз PayPal або праз Buy Me a Coffee.
А больш пра Наталлю Пяткевіч глядзіце ў відэафільме «Нашай Нівы»:
Цяпер чытаюць
Мінчук абурыўся кантынгентам у сталічным метро: Усе з новымі айфонамі, але не могуць дазволіць сабе танную машыну ці паездкі на таксі?20
Каментары