Прарэктарка БДУ пісала ў КДБ справаздачу аб тым, як спрабавала перавыхоўваць сем студэнтаў факультэта філасофіі
Студэнтам паказвалі прапагандысцкія фільмы, знаёмілі з міністрам унутраных спраў і нават вазілі ў жодзінскую турму. Справаздача пра гэта апынулася ў «Кіберпартызан».
У КДБ напісала прарэктарка па выхаваўчай працы Бакун Ганна Станіславаўна. З яе слоў, у 2023/24 вучэбным годзе БДУ спрабаваў перавыхаваць сем студэнтаў факультэта філасофіі і сацыяльных навук.
Увесь час дзеянні студэнтаў кантралявалі — як падчас заняткаў, так і па-за іх межамі. Гэта рабілася праз куратараў вучэбных груп.
У маі 2024 года студэнтам арганізоўвалі размову з супрацоўнікам пракуратуры Маскоўскага раёна Мінска, дзе яны павінны былі абмеркаваць «экстрэмізм».
Увесну таго ж 2024 года студэнтаў павезлі ў жодзінскую турму — з мэтамі прафілактыкі і азнаямлення.
Студэнтам паказвалі прапагандысцкія фільмы, вадзілі на сустрэчы з міністрам унутраных спраў Іванам Кубраковым і генеральным пракурорам Андрэем Шведам.
Таксама ім трэба было прысутнічаць на абмеркаваннях «Палітычныя партыі Беларусі» і мерапрыемстве ад БРСМ «Канстытуцыя: 30 год асноўнаму закону».
З яшчэ адным студэнтам, але з Юрыдычнага каледжа БДУ, прарэктарка Бакун таксама працавала. З ім яна правяла прафілактычную размову і звадзіла на мерапрыемства пра «генацыд беларускага народу». Размаўлялі і з бацькамі вучня — але пра паспяховасць гэтага рашэння нічога невядома.
Цяпер чытаюць
Жыгар — Краўцову: Я табе асабіста аплачу квіток да Мінска, там і дамаўляйся з Лукашэнкам!13
Каментары