«Сказалі, трэба праверыць вентыляцыйныя каналы». Пенсіянерка пусціла ў кватэру незнаёмцаў і засталася без 380 рублёў
Да жанчыны з Гродна на вуліцы Даватара ў госці завіталі «вентыляцыйшчыкі». Пра тое, як жанчына за паўгадзіны пазбавілася 380 рублёў, Onliner.by распавёў яе сын Іван.
— Удзень у дзверы кватэры пазванілі двое мужчын. Мама кажа, апранутыя былі звычайна, без формы, — распавядае гарадзенец. — Якую арганізацыю прадстаўлялі, таксама не паведамілі. Толькі сказалі, што ім тэрмінова трэба праверыць вентыляцыйныя каналы. Пасля агляду, паводле слоў маці, госці прапанавалі ёй усталяваць вентылятары для вентыляцыйных каналаў на кухні і ў прыбіральні. Маўляў, для пенсіянераў, асабліва ветэранаў працы, цяпер дзейнічае вялікая зніжка. Для пераканаўчасці распавялі пра тое, што некаторыя суседзі (таксама адзінокія пенсіянеры) ужо далі згоду на іх усталяванне.
Далей, кажа Іван, невядомыя папрасілі ў маці пенсійнае пасведчанне, каб запоўніць дамову і замацаваць подпісам. Пасля гэтага яны ўзяліся за ўсталяванне сумнеўных канструкцый. Дарэчы, камунальныя службы могуць зрабіць гэта бясплатна.
— Яны наспех паставілі гэтыя вентылятары і ўзялі з яе наяўнымі 380 рублёў за два прыборы. Між іншым, рэальная цана аднаго — каля 30 рублёў, — працягвае мужчына. — Мама аддала ім апошнія грошы, а крыху пазней зразумела, што яе падманулі. Я ж даведаўся пра ўсё толькі тады, калі прыехаў дадому. Адразу патэлефанаваў у 102.
Іван кажа, што ў дагаворы «вентыляцыйшчыкі» падстрахаваліся па поўнай. Чорным па белым яны прапісалі: «ціску і прымусу да ўсталявання не аказвалася» і «разумела свае дзеянні».
Пры гэтым у дагаворы ўказана сума 190 рублёў. Ніякіх чэкаў і іншых плацежных дакументаў маці на рукі не выдалі. Дарэчы, прадстаўнікі дадзенай арганізацыі заўважаныя і ў іншых кутках Беларусі. Як правіла, яны прыходзяць да адзінокіх старых, — падсумаваў Іван.
Што кажа юрыст?
Журналісты папрасілі юрыстку Юлію Емяльянаву пракаментаваць сітуацыю з пенсіянеркай, а таксама даведаліся, ці ёсць шанец скасаваць такі дагавор і вярнуць грошы.
— У разгляданай сітуацыі мела месца заключэнне дамовы падраду, па якім на дадзены момант працы ўжо выкананыя і аплачаныя гераіняй, якая выступае ў ролі заказчыка, у поўным аб’ёме, — тлумачыць Юлія. — Таксама падпісаныя ўсе дакументы: дагавор падраду, акт выкананых работ, заява да дагавора.
Улічваючы гэтыя абставіны і прымяняючы агульныя палажэнні аб падрадзе ў частцы аднабаковай адмовы ад дагавора, казаць пра магчымасць яго скасавання і вяртання грашовых сродкаў складана.
Аднак існуюць і іншыя спосабы абароны грамадзянскіх правоў, у прыватнасці — прызнанне здзелкі несапраўднай.
Пры наяўнасці адпаведных доказаў гераіня або яе прадстаўнік мае права звярнуцца ў суд з іскам аб прызнанні здзелкі несапраўднай як учыненай пад уплывам памылкі (арт. 179 ГК).
Паводле слоў юрысткі, пытанне прызнання здзелкі несапраўднай па дадзенай падставе складанае, патрабуе правільнага выбудоўвання прававой стратэгіі. Пазоўшчыку неабходна даказаць істотнасць памылкі адносна здзелкі і тое, што здзелка ўвогуле не была б учынена, калі б памылкі не было.
— Пры прызнанні здзелкі несапраўднай памылка з'яўляецца вынікам неасцярожнасці самога чалавека, які па сваёй неасцярожнасці пры заключэнні здзелкі сам памыляўся адносна характару здзелкі, яе віду. У выпадку прызнання здзелкі несапраўднай кожны з бакоў абавязаны вярнуць другому ўсё атрыманае па здзелцы, а пры немагчымасці вярнуць атрыманае ў натуры — кампенсаваць яго вартасць у грашах, — падсумавала Юлія.
-
«Нічога не здарыцца з маімі дзецьмі, калі яны не прачытаюць Барто, Маршака, Чукоўскага». Гутарка са стваральніцай блогу «Кніжныя размовы»
-
«Інтэр'еры з Pinterest» і «цэны як у Венецыі». У Гродне на месцы знесенага гістарычнага будынка адкрылі даражэнны буцік-гатэль
-
«Мяне вельмі моцна непакоіць, чыё яно». Гісторыя беларуса, якому ў Польшчы перасадзілі новае сэрца
Цяпер чытаюць
Ад БНФ да ГРУ. Хто такая Наталля Судлянкова, якой чэхі загадалі пакінуць краіну27
Каментары