Год таму назіраўся пік колькасці грамадзян Беларусі з дзейнымі літоўскімі дазволамі на жыхарства. Але пасля тэндэнцыя змянілася.
Паводле афіцыйнай статыстыкі, па стане на 1 красавіка 2025 года ў Літве засталося 53 739 грамадзян Беларусі з дзейнымі ДНЖ.
Гэта на 3772 чалавекі менш, чым было ў пачатку года.
У параўнанні з 1 красавіка 2024 года, калі ДНЖ у Літве мелі 62844 беларусы, адток склаў 9105 чалавек, ці амаль 15%.
Нягледзячы на тое, што колькасць грамадзян Беларусі ў Літве і так скарачаецца, некаторыя літоўскія палітыкі працягваюць прапаноўваць новыя абмежаванні для беларусаў.
У сакавіку тры парламентарыі з ліку кансерватараў (Лаўрынас Кашчунас, Аўдронюс Ажубаліс і Валдас Ракуціс) зарэгістравалі прапанову, дзе сярод іншага ідзе размова пра ануляванне ўжо выдадзеных ДНЖ у выпадку, калі грамадзяне Беларусі на працягу трох каляндарных месяцаў больш за адзін раз ездзілі на радзіму. Члены камітэта Сейма па нацыянальнай абароне аднагалосна падтрымалі прапанову кансерватараў. Гэтыя прапановы таксама былі падтрыманыя прадстаўнікамі прэзідэнцкай адміністрацыі і Дэпартамента дзяржаўнай бяспекі Літвы, але падвергліся крытыцы з боку бізнэс-арганізацый.
Генеральны дырэктар Міжнароднага транспартна-лагістычнага альянсу Повілас Дрыжас сцвярджае, што ў транспартных кампаніях Літвы працуюць каля 36 тысяч беларусаў і пасля ўвядзення санкцый іх колькасць пачала змяншацца.
Нягледзячы на тое, што для перавозчыкаў і кіроўцаў грузавікоў, што едуць транзітам праз Расію і Беларусь (а таксама ў выпадках, калі паездка мела аб’ектыўныя прычыны, незалежныя ад грамадзяніна), будуць прымяняцца выключэнні, прыняцце новых абмежаванняў можа прынесці праблем літоўскаму транспартна-лагістычнаму бізнэсу.
Рэч у тым, што большасць беларусаў, якія працуюць кіроўцамі-міжнароднікамі ў літоўскіх фірмах, выконваюць рэйсы па Еўрасаюзе, а ў Літве бываюць толькі некалькі дзён на год, калі едуць на кадэнцыю і назад. Звычайна кадэнцыя доўжыцца шэсць або восем тыдняў, пасля чаго кіроўца вяртаецца на базу ў Літву і адтуль на 2-3 тыдні едзе ў Беларусь.
То-бок мяжу яны перасякаюць не на фуры як кіроўцы, а як простыя грамадзяне. Такім чынам, беларускім дальнабойшчыкам давядзецца працаваць мінімум па тры месяцы, каб не перавысіць ліміт, або шукаць працу ў іншых краінах ЕС, дзе падобных абмежаванняў няма. Летась «Наша Ніва» гутарыла на гэтую тэму з дальнабойшчыкамі, тады большасць схілялася да таго, што зменяць краіну працы, калі Літва ўвядзе падобныя абмежаванні.
Адметна, што гаворка пра падобныя абмежаванні вялася і мінулай вясной. У 2024-м камітэт Сейма па нацыянальнай бяспецы і абароне Літвы ўхваліў прапанову абмежаваць колькасць паездак на радзіму грамадзянам Беларусі і Расіі, але тады Сейм не падтрымаў гэтую ініцыятыву.
Каментары
забыліліся як маліліся 💀
жадаю вам , суседушкі , каб да вас прыйшла арда ✌️
( а яна і не выходзіла ад вас , гэта бачна у вашай ,,ПАЛІТЫЦЫ,, )