Вядомыя спевакі Мадонна і Элтан Джон памірыліся і «закапалі сякеру вайны», паклаўшы канец 20-гадовай варожасці. Пра гэта 66-гадовая каралева поп-сцэны паведаміла ў сваім інстаграме, адзначыўшы, што даўняя крыўда засталася ў мінулым, а наперадзе — новая старонка ў іхных адносінах, піша Бі-бі-сі.
Зоркі варагавалі з пачатку 2000-х. Элтан Джон неаднаразова негатыўна выказваўся пра Мадонну, крытыкуючы яе манеру выканання і сцэнічны вобраз. Прымірэнне, паводле спявачкі, адбылося за кулісамі шоу Saturday Night Live.
Мадона распавяла, што вырашыла асабіста сустрэцца з Элтанам, даведаўшыся, што ён будзе музычным госцем шоу. Убачыўшы калегу па сцэне, Элтан сказаў: «Прабач мяне». Пасля чаго паміж імі, паводле слоў Мадонны, «звалілася сцяна», і яны «нарэшце закапалі сякеру вайны».
Яна таксама апублікавала свежае фота, на якім пазуе ў абдымках 78-гадовага спевака. Мадона згадала, як у падлеткавым узросце тайком уцякла з дому, каб убачыць выступ Элтана ў Дэтройце. Той канцэрт, па яе словах, змяніў яе жыццё.
«Я заўсёды адчувала сябе аўтсайдарам, а гледзячы на яго на сцэне, зразумела, што быць іншай — гэта не толькі нармальна, але і неабходна», — напісала спявачка.
Яна дадала, што не разумела стаўленне Элтана Джона да яе.
«Цягам дзесяцігоддзяў мне было балюча ўсведамляць, што чалавек, якім я так захаплялася, публічна выказваў сваю непрыязнасць да мяне як да артысткі».
Напружанне ў адносінах зорак паходзіць з нулявых гадоў.
У 2004-м Элтан Джон раскрытыкаваў намінацыю сваёй калегі ў катэгорыі «Лепшае жывое выкананне» на прэміі Q Awards.
Спявак абвінаваціў Мадонну ў выступе пад фанаграму.
«Кожнага, хто проста варушыць вуснамі на сцэне, а вы плаціце за гэта 75 фунтаў стэрлінгаў (134 даляры ЗША), трэба расстраляць», — заявіў сэр Элтан, маючы на ўвазе цэны квіткоў на канцэрты сусветнага турнэ Мадонны Reinvention Tour.
«З якіх часоў адкрыванне рота пад фанаграму пачалі называць жывым выкананнем?» — дадаў тады выканаўца.
Каманда Мадонны адмаўляе, што яна спявала пад фанаграму.
У наступныя гады Элтан узмацніў сваю крытыку.
У 2012 годзе ён заявіў, што артыстка выглядае як «стрыптызёрка на кірмашы».
Таксама ён дадаў, што Мадонна не мае ніякага шанцу перамагчы яго ў барацьбе за «Залаты глобус» у намінацыі «Лепшая арыгінальная песня».
Аднак спявачка атрымала гэтую прэстыжную ўзнагароду за трэк Masterpiece, напісаны спецыяльна для фільма «Мы. Верым у каханне».
Пасля гэтага Мадонна сказала журналістам, што спадзяецца, што цяпер Элтан «будзе размаўляць са мной цягам наступных некалькіх гадоў, бо вядома, што ён на мяне злуецца».
Новы пачатак
У сваім допісе Мадонна дапусціла, што іхняе прымірэнне можа прывесці да музычнага партнёрства. Паводле яе слоў, Элтан прапанаваў ёй супрацу, згадаўшы, што напісаў для яе песню.
У адказ спявак падзякаваў Мадонне за тое, што яна «прабачыла мяне і мой вялікі рот».
Ён дадаў, што не ганарыцца тым, што казаў пра яе цягам многіх гадоў, асабліва ўлічваючы «інавацыйную працу Мадонны… якая праклала шлях цэламу пакаленню жанчын-артыстак да поспеху і вернасці сабе».
«Мяне ўсё больш засмучае ўся гэтая варожасць у нашым свеце, — адзначыў ён у каментары да яе допісу ў інстаграме. — Спадзяюся, што, аб’яднаўшыся, мы зможам зрабіць вялікія справы для тых, хто сапраўды мае патрэбу ў падтрымцы, і атрымаць ад гэтага задавальненне».
Цяпер чытаюць
Бедны, расчараваны — асабліва ў родных — і нікому непатрэбны. Злы дзённік Барадуліна дазваляе зазірнуць унутр генія8
Каментары