Міністэрства лічбавага развіцця, інавацый і аэракасмічнай прамысловасці Казахстана патлумачыла магчымую прычыну загадкавых агнёў у небе над некалькімі гарадамі краіны, перадае Tengrinews.kz.
«У ноч з 5 на 6 чэрвеня жыхары Цэнтральнага і Паўночнага Казахстана, уключаючы Астану, Караганду, Паўладар і Кастанай, назіралі ў небе яркі светлавы феномен. Паводле папярэдніх ацэнак, ідзе гаворка пра ўваход у атмасферу аднаго з касмічных аб’ектаў, што раней знаходзіўся на арбіце», — патлумачыла прэс-служба.
Згодна з данымі міжнародных арганізацый, што адсочваюць перамяшчэнні касмічнага смецця, у гэты прамежак часу сапраўды былі зарэгістраваны тры падзеі, кожная з якіх патэнцыйна магла выклікаць назіраную з’яву.
Першае — гэта разгонны блок кітайскай ракеты ZQ-2E.
«Час уваходу: 5 чэрвеня каля 22:40. Аб’ект: ступень ракеты Zhuque-2 Enhanced, запушчанай 17 мая кампаніяй LandSpace. Асаблівасці: выкарыстоўваецца экалагічнае паліва (вадкі метан і кісларод), мяркуецца маштабнае ззянне пры згаранні», — гаворыцца ў прэс-рэлізе.
Пры гэтым адзначаецца, што менавіта гэты аб’ект найбольш дакладна супадае па часе і візуальным апісанні з тым, што назіралі казахстанцы.
Паведамляецца, што другі аб’ект — спадарожнік STARLINK-1631 (SpaceX).
«Час уваходу: 6 чэрвеня ў 03:41 па алмацінскім часе. Планавы сход з арбіты аднаго са старых спадарожнікаў», — удакладнілі ў міністэрстве.
І трэці аб’ект — разгонны блок японскай ракеты H-2A R/B. Яго час уваходу — 6 чэрвеня ў 00:36 па алмацінскім часе, ён знаходзіўся ў рэжыме пасіўнага сходу.
«На дадзены момант адсутнічаюць пацверджаныя даныя пра падзенне якіх-небудзь фрагментаў на тэрыторыі Рэспублікі Казахстан або пра нанясенне шкоды. Як правіла, падобныя аб’екты цалкам згараюць у атмасферы (падзенне буйных аб’ектаў на тэрыторыі Казахстана малаверагодна), а сама з’ява ўяўляе сабой відовішчны, але бяспечны працэс», — патлумачылі ў міністэрстве.
Цяпер чытаюць
Учора Мінск зноў затапіла. Чаму сталіца не гатовая да дажджоў?2
Каментары