Кітайскі міністр заявіў прадстаўніку ЕС, што Пекін не хоча паразы Пуціна ва Украіне
Кітай баіцца, што ў такім выпадку ЗША цалкам пераключаць сваю ўвагу на ўсход.
Міністр замежных спраў Кітая Ван І 3 ліпеня правёў сустрэчу з вярхоўным прадстаўніком Еўрасаюза па замежных справах Каяй Калас. Як пішуць СМІ, падчас чатырохгадзінных закрытых перамоў па шырокім спектры геапалітычных і гандлёвых пытанняў кітайскі чыноўнік прачытаў Калас «некалькі ўрокаў гісторыі і лекцый».
Як сцвярджае South China Morning Post, Ван І заявіў, што Пекін не хоча паразы Расіі ва Украіне, бо баіцца, што ў такім выпадку Злучаныя Штаты Амерыкі цалкам пераключаць сваю ўвагу на Пекін. Пра гэта выданне паведамляе са спасылкай на некалькі крыніц. Гэты каментар, зроблены прадстаўніку ЕС, пацвердзіў тое, што многія ў Бруселі лічаць пазіцыяй Пекіна, але супярэчыць публічным заявам Кітая.
МЗС гэтай краіны рэгулярна заяўляе, што афіцыйны Пекін не з'яўляецца бокам вайны. Таксама Ван І адхіліў абвінавачванні ў тым, што Кітай матэрыяльна ці фінансава падтрымлівае ваенныя намаганні Расіі, настойваючы на тым, што калі б ён гэта рабіў, канфлікт даўно б скончыўся.
Каментары