Зяленскі: Расія ўпершыню настроеная на сур'ёзную размову ў Абу-Дабі, а ЗША прапануюць Маскве «эканамічны шлюб»
Пра расійскія патрабаванні, тэрытарыяльныя прапановы ЗША, новыя пагрозы і магчымасці прэзідэнт Украіны Уладзімір Зяленскі расказаў падчас размовы з журналістамі. Галоўнае з яго заяў.
Масква хоча вырашаць, як будзе абараняцца Еўропа
Паводле Зяленскага, Расія настойвае: калі Украіна атрымлівае гарантыі бяспекі, Масква таксама павінна іх атрымаць. Аднак пад аднолькавымі словамі бакі разумеюць розныя рэчы.
«Яны кажуць: «Калі вы хочаце гарантыі бяспекі для Украіны, то мы хочам для Расіі». Варта разумець, які сэнс у гэта ўкладае Расія. Гэта не проста пра тое, што Украіна не будзе наносіць па іх удары. Для іх гэта значна больш шырокае і больш спецыфічнае пытанне», — патлумачыў Зяленскі, цытуе яго «УНІАН».
Ён кажа, што Масква дамагаецца асобнага пагаднення з НАТА або ЗША, якое замацавала б яе ўяўленні пра еўрапейскую і сусветную бяспеку. Патрабаванне адкаціць НАТА да стану 1997 года Зяленскі разглядае як спробу пераразмеркаваць уплыў і змяніць усю сістэму бяспекі ў Еўропе.
Гэта непасрэдна закранае і суседзяў Беларусі. У 1997 годзе ў НАТА яшчэ не было Польшчы, Літвы, Латвіі і Эстоніі.
Паводле Зяленскага, вырашаць такія пытанні могуць толькі самі краіны НАТА. Ні Расія, ні Украіна не могуць прымаць за іх рашэнні.
«Любое адступленне, любы адкат у сферы бяспекі — гэта слабасць для Альянсу», — сказаў ён.
Спачатку — завяршэнне вайны і гарантыі для Украіны
Зяленскі мяркуе, што заўчасна абмяркоўваць глабальныя патрабаванні Масквы, пакуль не вядома, на якіх умовах скончыцца вайна супраць Украіны і як будзе гарантаваная бяспека саміх украінцаў.
«Спачатку трэба вырашыць пытанні гэтай вайны, а потым шукаць адказы на тыя пытанні, якія Расія ставіць на аснове сваіх уяўленняў і чаканняў пра бяспеку», — заявіў ён.
З гэтай жа прычыны Кіеў настойвае на ўдзеле еўрапейцаў у перамовах. Паводле Зяленскага, без іх нельга абмяркоўваць ні гарантыі бяспекі, якія прадугледжваюць удзел еўрапейскіх краін, ні пасляваеннае аднаўленне Украіны.
Магчымую сустрэчу лідараў ЗША, Расіі і Кітая ў Пекіне Зяленскі таксама разглядае праз рызыку перадзелу сфер уплыву. Паводле яго, дакладны парадак дня пакуль невядомы, але сярод тэм могуць быць Украіна і Блізкі Усход.
«Вельмі не хочацца, каб гэта была «Ялта — 2, 3, 4», калі ідзе пераразмеркаванне ўплыву», — сказаў ён.
На думку Зяленскага, найбольш такі фармат патрэбны Расіі: сустрэча магла б стаць яшчэ адным сур’ёзным выйгрышам Крамля пасля перамоваў Пуціна і Трампа на Алясцы.
«Я проста не бачу выгады для Кітая і дакладна бачу выгаднасць гэтага фармату для Расіі. Пабачым, што гэта будзе за сустрэча», — адзначыў ён.
Якія тэрытарыяльныя кампрамісы прапаноўвалі ЗША
Зяленскі расказаў, што амерыканскі бок на розных этапах прапаноўваў дэмілітарызаваныя зоны, рашэнні адносна Запарожскай АЭС у спалучэнні з абменам тэрыторыямі, а таксама буферную зону па абодва бакі лініі сутыкнення на Данбасе.
Стварэнне такой зоны на Данбасе Украіна была гатовая абмяркоўваць.
Асобная прапанова тычылася Кінбурнскай касы: зрабіць частку тэрыторыі дэмілітарызаванай і пакінуць яе пад кантролем Украіны.
Аднак далейшага прасоўвання па гэтых варыянтах, паводле прэзідэнта, няма. Масква звязвае тэрытарыяльныя патрабаванні з завяршэннем вайны, а вырашаць іх на ўзроўні папярэдніх дакументаў немагчыма.
«Гэта пытанне, якое могуць абмяркоўваць толькі лідары дзяржаў, якія ваююць, і толькі на сваім узроўні. Ні ў кога іншага такіх паўнамоцтваў няма», — падкрэсліў Зяленскі.
Што плануюць абмеркаваць у лістападзе
Паводле Зяленскага, пасля размовы з Пуціным прэзідэнт Фінляндыі Аляксандр Стуб і прэм’ер Нарвегіі Ёнас Гар Сцёрэ перадалі яму, што расійскі бок сур’ёзна настроены на трохбаковую сустрэчу з Украінай і ЗША ў лістападзе.
Кіеў плануе абмеркаваць дээскалацыю ў энергетыцы і на моры, абмен палоннымі і магчымую сустрэчу трох прэзідэнтаў. Пасля гэтага Украіна разлічвае на перамовы з удзелам Еўропы.
Расія прапануе ЗША «эканамічны шлюб»
Зяленскі асцерагаецца, што дамоўленасць аб расійскім дызельным паліве адкрывае шлях да новых пагадненняў Масквы з Вашынгтонам. Яны могуць закрануць угнаенні, газ, замарожаныя актывы і зняцце санкцый з асобных людзей і кампаній.
Паводле яго, Расія выкарыстоўвае свае прыродныя рэсурсы, каб прапанаваць ЗША своеасаблівы «эканамічны шлюб». У доўгатэрміновай выгадзе такіх адносін для амерыканцаў ён сумняваецца.
«У Расіі ў кожным пагадненні ёсць нейкая непрыемная частка, якую адразу не відаць», — сказаў Зяленскі.
Ракеты для Patriot і выбары
Паводле Зяленскага, на працягу 2026 года Украіна атрымлівала ад ЗША ў сярэднім толькі 12 ракет для Patriot на месяц. Абмежаваныя пастаўкі ён звязаў з вайной на Блізкім Усходзе.
Асобна прэзідэнт заявіў, што правесці выбары ва Украіне падчас вайны немагчыма. Для падрыхтоўкі бяспечнага выбарчага працэсу, паводле яго, спатрэбіцца не менш за шэсць месяцаў.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары