Жыхары шматпавярховіка ў цэнтры Мінска страцілі сон праз спеў паўлінаў

«Яны з'явіліся яшчэ зімой, — успамінае Марыя. — На дрэвах не было лістоты, і са свайго акна мы іх бачылі, таму дакладна ведаем, што гэта паўліны. Там іх двое. Калі яны крычаць, чуваць нават праз зачыненае акно.

Адбываецца гэта не кожны дзень, мы заўважылі, што гукі даносяцца па выхадных. І пачынаецца гэты галас у пачатку пятай раніцы. Ён настолькі гучны, што спаць немагчыма».

Калі журналісты прыехалі на месца, у квартале было ціха: птушкі маўчалі. Хоць яны сапраўды могуць вельмі гучна і рэзка крычаць: іх чуваць за некалькі кіламетраў. Галасы гэтых прыгажуноў нават высмейвалі ў мультфільме «Прыгоды Мюнхгаўзэна».

Павялічыць

Зрэшты, турбуюць пранізлівыя «спевы» не ўсіх: адзін з суседзяў Марыі пацвердзіў, што паўлінаў у кватэры чуваць, але дыскамфорту ў яго гэта не выклікае.

«Нам, наадварот, у радасць, гэта ж жывыя істоты!» — сказаў мужчына.

Аднак Марыя падкрэслівае: не толькі яна і яе сям'я страцілі сон з-за незвычайнага суседства. У дамавым чаце з тым, што праблема ёсць, пагадзіліся і некаторыя іншыя жыхары. А вось ці ёсць спосаб яе вырашыць, дзяўчына не ведае.

«У жыхароў дома два пытанні: наколькі законна ўтрыманне такіх жывёл у межах горада і калі законна, то ці можам мы неяк паўплываць на ўладальнікаў паўлінаў і пераканаць іх адмовіцца ад птушак, — кажа дзяўчына. — І пакуль мы не ведаем на іх адказу, ісці да гаспадароў паўлінаў і абмяркоўваць сітуацыю не гатовыя. Што мы ім скажам?»

Павялічыць

Але да таго самага «гучнага дому» журналісты ўсё ж прагуляліся. Гаспадыня птушак была на месцы і выйшла да нечаканых гасцей. Жанчына прызналася: яна падазравала, што яе гадаванцы могуць шумець, калі нікога няма дома, але пакуль ніхто на гэта не скардзіўся.

«Мы вымушаныя выязджаць з горада па выхадных, на гэты час пакідаем адчыненымі дзверы з птушніка ў вальер, і калі паўліны ў ім, то яны могуць крычаць, асабліва цяпер, калі ў іх шлюбны перыяд, — патлумачыла гаспадыня. — Надалей буду прасіць суседку, каб выпускала птушак на шпацыр днём і пасля заганяла, пакуль мы ў ад'ездзе. У птушніку яны не крычаць, так што нікога больш турбаваць не будуць».

А што гаворыць закон?

У гэтай гісторыі канфлікт паміж суседзямі з-за птушак удалося вырашыць хутка — дзякуючы журналістам людзі паразумеліся, абмяняліся тэлефонамі і адна з жанчын, Марыя, нават прапанавала дапамагаць — выпускаць і заганяць птушак, калі суседзяў няма дома.

Але не заўсёды канфлікт можна вырашыць мірна. Што рабіць, калі дамовіцца не атрымліваецца, а жывёлы суседзям перашкаджаюць? На гэтае пытанне адказала адвакатка Мінскай гарадской калегіі адвакатаў Крысціна Асран.

Яна растлумачыла, што ў Беларусі існуюць дакументы, якія рэгулююць утрыманне жывёл дома. Ёсць спіс дзікіх жывёл, якіх нельга трымаць у кватэрах, дамах ці на прыдамавых участках.

У спісе забароненых для ўтрымання жывёл значацца фламінга, пінгвіны, страўсы (афрыканскія і аўстралійскія), а таксама львы, тыгры, жырафы, мядзведзі, кобры, марскія чарапахі і іншыя небяспечныя або экзатычныя жывёлы.

Паўлінаў у гэтым спісе няма, таму іх можна трымаць каля прыватнага дома.

Але, падкрэсліла адвакатка, трэба выконваць і іншыя правілы — напрыклад, не ствараць шум або вібрацыю з 23:00 да 7:00, у тым ліку праз жывёл. Гэтае правіла тычыцца як жыхароў шматкватэрных, так і прыватных дамоў. За яго парушэнне прадугледжаны штраф, і калі жывёлы перашкаджаюць ноччу ці на світанку, можна выклікаць міліцыю.

Таксама гаспадары прыватных дамоў павінны мець вальеры і агароджы не ніжэйшыя за 1,7 метра, калі выгульваюць жывёл. За парушэнні гэтых патрабаванняў таксама накладаецца штраф. Калі суседзі не выконваюць правілы, можна падаць заяву ў міліцыю ці адміністрацыю раёна.

Не варта забывацца і пра закон «Аб адказным абыходжанні з жывёламі». Ён абавязвае гаспадароў забяспечваць такое ўтрыманне жывёл, каб не парушаліся правы іншых людзей. Паўліны таксама могуць лічыцца жывёламі-кампаньёнамі, калі іх трымаюць дзеля эстэтычнага задавальнення.

• 3
• 0
• 2
• 1
• 1
• 0
• 0
• 0