У Гомелі жанчына спрабавала адкупіць мужа ад міліцыі, зараз яе саму чакае суд
55-гадовая гамяльчанка выклікала да сябе дадому міліцыю, а потым спрабавала падкупіць аднаго з супрацоўнікаў, каб выратаваць мужа. Падрабязнасці гэтай недарэчнай гісторыі «Белцы» расказалі ў пракуратуры Гомеля.
У маі гэтага года да пару ў госці зайшоў кум. Мужчыны размясціліся на кухні і пачалі выпіваць, жонка гаспадара час ад часу падыходзіла да стала.
Калі гаспадар дома і кум добра напіліся, жанчына папрасіла іх спыніць застолле і разысціся, але яе просьбу праігнаравалі. Тады яна выклікала міліцыю, каб людзі ў форме выгналі кума з дому.
На выклік прыехалі два супрацоўнікі Чыгуначнага РАУС. Гаспадар на той момант ужо лёг спаць, але як толькі міліцыянеры зайшлі ў дом, ён ускочыў і пачаў скандаліць, лаяўся матам. Супрацоўнікі некалькі разоў прасілі яго супакоіцца — безвынікова. Тады яго затрымалі за непадпарадкаванне і лаянку, вывелі з дому проста ў трусах і пасадзілі ў службовы аўтамабіль.
Пакуль міліцыянеры займаліся мужам, жонка спрабавала пераканаць іх адпусціць яго. А калі яе папрасілі сабраць мужу рэчы, жанчына зрабіла нечаканае — пачала ўгаворваць аднаго з міліцыянераў узяць хабар 100 даляраў.
«У выніку ўсіх траіх затрымалі: кума — за з’яўленне ў п’яным выглядзе ў грамадскім месцы, мужа — за абразу міліцыі, а на жанчыну завялі крымінальную справу за спробу даць хабар службовай асобе пры выкананні службовых абавязкаў. Ёй пагражае штраф, папраўчыя работы, арышт або нават пазбаўленне волі на тэрмін да пяці гадоў. Справа ўжо накіраваная ў суд», — паведаміла памочніца пракурора Гомеля па асаблівых даручэннях Марыя Пушкар.
Цяпер чытаюць
СК апублікаваў відэазапіс падзення беспілотніка. На абломках паказалі ўкраінскія надпісы31
Каментары