Літоўскі дэпутат-нацыяналіст Вітаўтас Сініца прапанаваў Міністэрству замежных спраў краіны скасаваць акрэдытацыю прадстаўніцтва беларускай дэмакратыі, то-бок Офіса Святланы Ціханоўскай. Аднак сам міністр замежных спраў Кястуціс Будрыс не бачыць для гэтага падстаў.
«Статус, які прадстаўніцтву быў нададзены, дазваляе яму функцыянаваць, дзейнічаць, выконваць свае задачы, аб’ядноўваць дэмакратычныя сілы. […] На гэты момант я не бачу падстаў разглядаць гэта пытанне», — сказаў кіраўнік літоўскай дыпламатыі журналістам.
Член Камітэта нацыянальнай бяспекі і абароны Сойма Літвы Вітаўтас Сініца ў сваім звароце заяўляў, што Офіс Святланы Ціханоўскай, маўляў, карыстаецца гасціннасцю і добрай воляй Літвы не для прасоўвання добрасуседскіх адносін, а з мэтай стварэння своеасаблівай базы «альтэрнатыўнай Беларусі» ў Літве. Таксама ён абвінавачваў Ціханоўскую ў тым, што яна нібыта выразна не асуджае «ліцвінізм» і крытыкуе намеры Літвы абмежаваць іміграцыю з Беларусі з меркаванняў нацыянальнай бяспекі, чым нібыта ўмешваецца ва ўнутраныя справы краіны.
Таксама літоўскі парламентарый звярнуў увагу на нашумелае апошнім часам выказванне Сяргея Ціханоўскага пра магчымасць стварэння аўтаномных «астравоў» беларусаў. Сініца ўспрымае гэтыя выказванні як «пастаноўку пад сумнеў тэрытарыяльнай цэласнасці Літвы і яе дзяржаўнага ладу, таму яны павінны быць рашуча асуджаныя».
Сам Ціханоўскі адразу пасля таго, як ягоныя словы выклікалі скандал, патлумачыў, што меў на ўвазе зусім іншае.
Вітаўтас Сініца — палітолаг, філосаф і адзіны ў Сойме Літвы дэпутат ад нацыяналістычнай партыі Нацыянальнае аб'яднанне. Партыя сабрала 2,93% галасоў на выбарах 2024 года і па партыйных спісах у парламент не прайшла, але Сініца ў другім туры перамог у віленскай акрузе Каралінішкі-Замачак свайго суперніка з партыі «Саюз Айчыны».
Літоўскае тэлебачанне падкрэсліла, што ні Ціханоўская, ні яе прэс-сакратарка дагэтуль не валодаюць літоўскай мовай
Ціханоўскі пасля шуміхі вакол яго слоў пра аўтаномныя «астравы» беларусаў за мяжой патлумачыў сваю пазіцыю
Наўседа выказаўся наконт ідэі Ціханоўскага пра аўтаномныя «астравы» беларусаў у розных краінах
Каментары
Хто даў гэтаму міністру права намінаваць менавіта Святлану ЦІханоўскую як нейкую прадстаўнічку? Якая працэдура змены кіраўніцтва ў гэтай структуры?
Мы, беларусы, не задаволеныя дзейнасцю і адсутнасцю вынікаў працы Ціханоўскіх і Ко. Патрэбны новы рухавік!
"Вітаўтас Сініца ў сваім звароце заяўляў, што Офіс Святланы Ціханоўскай, маўляў, карыстаецца гасціннасцю і добрай воляй Літвы не для прасоўвання добрасуседскіх адносін, а з мэтай стварэння своеасаблівай базы «альтэрнатыўнай Беларусі» ў Літве. Таксама ён абвінавачваў Ціханоўскую ў тым, што яна нібыта выразна не асуджае «ліцвінізм» і крытыкуе намеры Літвы абмежаваць іміграцыю з Беларусі з меркаванняў нацыянальнай бяспекі, чым нібыта ўмешваецца ва ўнутраныя справы краіны." І гэтаму беларусы сваім існаваннем пачалі замінаць. Я калісці пісаў, што белерусы ператвараюцца ў "новых яўрэяў" (народ без зямлі), моцна залежны ад "надвор'я" у галаве чыноўнікаў краіны, якая дае прытулак. А калі наступныя чыноўнікі проста выганяць беларусаў? Раней расейская мова сярод т.зв.
"дэмакратычнай суспольнасці" лічылася ледзь не "крытэрам адэкватнасці", а цяпер за расейскамоўнасць пачынаюць паўсюдна біць.