У Паўночным Беразе пачалі будоўлю першай школы. Вось якой яна будзе
Забудоўшчык прыступіў да актыўнай фазы будаўніцтва новай школы ў Паўночным Беразе. Плануецца, што ўстанову на 1200 вучняў з двума басейнамі здадуць у 2027 годзе, піша Realt.
Школа размесціцца ў чацвёртым квартале комплексу, на ўчастку 3,5 гектара. Вакол будынку будуць зялёныя зоны з ландшафтным дызайнам.
Для пачатковай школы ў двары забудоўшчык абсталюе вялікую гульнявую пляцоўку, а ў самой школе з'явяцца інтэрактыўныя зоны адпачынку для малодшых і старэйшых класаў.
— Пакуль што мы не прапануем ніякай супер-графікі на сценах. Хочацца замест гэтага напаўняць інтэр'ер цікавай мэбляй, матэрыяламі, свяцільнямі, не перагружаючы яго візуальна. У маім уяўленні, школьнае асяроддзе павінна быць толькі фонам для дзяцей, якія ўжо самі будуць вырашаць, чым там займацца ў вольны час, — кажа архітэктар праектнай арганізацыі «Мінскграмадзянпраект» Юлія Лыгіна.
У новай школе будзе адразу два басейны: для малодшых класаў і для старэйшых. Вялікі 25‑метровы басейн можна будзе выкарыстоўваць і для патрэб раёна. Для абслугоўвання жыхароў прадугледзяць асобны ўваход.
Таксама ў школе запраектаваныя малая і вялікая спартыўныя залы, абсталяваная трэнажорная зала.
На прышкольнай тэрыторыі размесцяцца дзве валейбольныя і баскетбольныя пляцоўкі, а таксама адкрытая воркаўт зона. Поўнапамерны футбольны стадыён з кругавым бегавым трэкам і трыбунамі для заўзятараў стане месцам правядзення школьных спартыўных турніраў.
Дарэчы, фармаванне настаўніцкага складу для новай школы ўжо пачалося.
Адкрыццё новай школы, напэўна, ацэняць жыхары не толькі Паўночнага Берага. Бо гэта дапаможа вырашыць праблему недахопу адукацыйных месцаў і пазбавіць бацькоў неабходнасці далёкіх паездак.
— Наша мэта — стварыць цэнтр развіцця, дзе вучні змогуць расці, вучыцца і раскрываць свае таленты. Мы хочам, каб школа забяспечыла камфортны і эфектыўны навучальны працэс як для вучняў, так і для педагогаў, — адзначае Антон Русакевіч, дырэктар кампаніі-забудоўшчыка Паўночнага Берага.
Будаўніцтва школы для забудоўшчыка — частка маштабнай стратэгіі развіцця інфраструктуры комплексу. У далейшым у Паўночным Беразе плануецца будаўніцтва яшчэ 12 школ і 17 дзіцячых садоў, а таксама Інстытута штучнага інтэлекту, што значна палепшыць адукацыйныя ўмовы ў раёне.
«Паўночны Бераг» — жылы комплекс на беразе Цнянскага вадасховішча, які рэалізуе ТАА «Рыверсайд Дэвелапмент Лімітэд». Сёння ў комплексе актыўна будуюць як жылыя дамы, так і сацыяльную інфраструктуру. 13 жылых дамоў у комплексе ўжо здадзеныя, яшчэ 26 дамоў і 2 цырульні — у працэсе будоўлі.
Цяпер чытаюць
Вандроўнік і бізнэсовец з Мінска за два дні знайшоў сабе праз сацсеткі нявесту — найбольш спадабалася дзяўчына з Расіі34
Каментары