Балтыйскае мора імкліва мялее — навукоўцы адзначаюць рэдкую кліматычную анамалію
Балтыйскае мора ў лютым страціла 275 млрд тон вады — гэта рэдкая з’ява, выкліканая моцнымі ўсходнімі вятрамі і парушэннем цыркуляцыі паветра над Арктыкай.
У той час як узровень вады ў Сусветным акіяне працягвае павышацца, Балтыйскае мора ў пачатку лютага страціла каля 275 мільярдаў тон вады, а яго ўзровень апынуўся на 67 см ніжэй за сярэдні паказчык, зафіксаваны ў 1886 годзе, піша Еuronews.
Паводле слоў Томаша Кіеўскага з Інстытута акіяналогіі Польскай акадэміі навук, хоць падобная сітуацыя не назіралася апошнія 140 гадоў, яна тлумачыцца атмасфернымі фактарамі. «Гэта яскравы прыклад уплыву змены клімату на навакольнае асяроддзе. Арктыка тут адыгрывае ключавую ролю», — адзначыў ён.
Чаму вада сыходзіць з басейна Балтыйскага мора, калі агульны ўзровень акіяна расце? Эксперты тлумачаць гэта спалучэннем моцных усходніх вятроў, зоны высокага ціску і адсутнасцю значных атмасферных франтоў.
«Працяглыя моцныя ўсходнія вятры выцеснілі водныя масы праз Дацкія пралівы ў Паўночнае мора, што прывяло да падзення ўзроўню вады ва ўсім басейне», — паведамілі ў Інстытуце акіяналогіі. Пакуль захоўваецца такая метэаралагічная канфігурацыя, вада «ўтрымліваецца» ў паўднёва-ўсходняй частцы басейнаў, а ўзровень лакальна зніжаецца.
Кіеўскі дадае, што такія з’явы — не доказ адсутнасці змяненняў клімату, а, наадварот, вынік складаных анамалій, выкліканых, у прыватнасці, раставаннем ледавікоў у Арктыцы.
«Сама змена клімату праяўляецца ў шматлікіх пагодных анамаліях, а не толькі ў агульным пацяпленні», — тлумачыць ён.
Паводле слоў даследчыка, масавыя адхіленні звязаныя з распадам палярнай віхуры — цыркуляцыі паветра ў верхніх пластах атмасферы, якая ўтрымлівае холад у Арктыцы.
«Маса халоднага паветра пачынае «разгерметызоўвацца», уплываючы на атмасферныя плыні, — кажа ён. — Мы жартам называем гэта эфектам адчыненай лядоўні: бо калі мы адчыняем лядоўню, то халоднае паветра вырываецца вонкі, і нам становіцца прахалодна».
Цяпер чытаюць
Пяць дзён, 60 удзельнікаў, саўна, більярд і крыкі адно на аднаго. Расказваем, як прайшла закрытая «гульня Мацкевіча»59
Каментары