30 кастрычніка намеснік міністра замежных спраў Беларусі Ігар Сакрэта паведаміў пра візіт у Мінск генеральнага сакратара АБСЕ Ферыдуна Сінірліоглу. Паводле яго слоў, Сінірліоглу возьме ўдзел у чацвёртай штогадовай Мінскай міжнароднай канферэнцыі па еўразійскай бяспецы, якая пройдзе 3—4 лістапада.
70‑гадовы Ферыдун Сінірліоглу з Турцыі займае пасаду генеральнага сакратара АБСЕ са снежня 2024 года. Ягоны тэрмін паўнамоцтваў складае тры гады. Ён таксама з’яўляецца адным з кандыдатаў на пасаду генеральнага сакратара ААН.
Намеснік кіраўніцы Аб'яднанага пераходнага кабінета Беларусі, кіраўнік Народнага антыкрызіснага ўпраўлення Павел Латушка назваў гэты візіт «нелагічным» і «неадэкватным». Сваё меркаванне ён выказаў на ўласным ютуб-канале, піша выданне «Позірк».
Па словах Латушкі, такі візіт цяжка было б уявіць у часы, калі ён сам працаваў дыпламатам, з улікам масавых рэпрэсій у Беларусі, наяўнасці палітвязняў, гібрыднай агрэсіі супраць суседніх краін і падтрымкі расійскай вайны супраць Украіны.
Пры гэтым Латушка прызнаў, што дыпламаты павінны размаўляць, а генеральны сакратар АБСЕ як міжнародны чыноўнік мусіць падтрымліваць пэўныя кантакты. Аднак, на яго думку, для гэтага ёсць пляцоўка ў Вене, дзе знаходзіцца штаб-кватэра арганізацыі. Ён прапанаваў, каб туды прыехаў прадстаўнік уладаў Лукашэнкі.
Пазней у тэлеграм-канале Аб’яднанага пераходнага кабінета з’явілася паведамленне, што Латушка накіраваў Сінірліоглу ліст, у якім паведаміў пра колькасць палітвязняў у Беларусі. Ён заклікаў генеральнага сакратара падчас візіту ў Мінск узняць пытанне вызвалення ўсіх палітвязняў і спынення пераследу людзей за іх палітычныя погляды.
Асобную ўвагу ў лісце Латушка надаў пытанням рэгіянальнай бяспекі. Ён падкрэсліў, што Беларусь павінна стаць краінай, якая спрыяе бяспецы і стабільнасці ў рэгіёне. Аднак, паводле яго меркавання, пакуль ва ўладзе застаецца Лукашэнка, гаварыць пра надзейныя гарантыі бяспекі немагчыма.
Латушка нагадаў, што беларускую тэрыторыю Расія выкарыстала для агрэсіі супраць Украіны. Акрамя таго, беларускія ўлады працягваюць гібрыдныя дзеянні супраць суседніх дзяржаў — удзельніц АБСЕ і спрыяюць дыверсійнай дзейнасці. Таму кіраўнік НАУ прапанаваў генеральнаму сакратару арганізацыі заклікаць фактычныя беларускія ўлады пачаць інклюзіўны дыялог з грамадзянскай супольнасцю.
Настасся Касцюгова пра пазіцыю Статкевіча і Ціханоўскай: Прапанова «даціснуць» гучыць як прапанова яшчэ пачакаць незразумела чаго і як доўга
Латушка: Перамовы па Украіне могуць адкрыць магчымасці для Беларусі. Дэмсілы павінны быць за сталом
Латушка: Ідзе пяць крымінальных справаў, звязаных з пагрозай майму жыццю і здароўю
Каментары