У ААН зарэгістравалі скаргу былой палітзняволенай Ларысы Шчыраковай на прымусовую дэпартацыю з Беларусі
Былую палітзняволеную журналістку Ларысу Шчыракову вывезлі з папраўчай калоніі за некалькі месяцаў да заканчэння тэрміну, без рашэння суда і без яе згоды.
У ААН зарэгістравалі скаргу на прымусовую дэпартацыю з Беларусі вызваленай па памілаванні журналісткі Ларысы Шчыраковай, напісаў у фэйсбуку праваабаронца Леанід Судаленка.
«Заканадаўства Беларусі не прадугледжвае выдварэнне сваіх грамадзян. Не было рашэння суда аб вызваленні, як і рашэння аб выдварэнні. Не было права на абскарджанне. Фактычна пазбаўленне волі было спынена праз прымусовае выгнанне», — піша Судаленка.
У Беларусі ў Ларысы засталіся пажылы бацька і сын. Падчас зняволення памерла маці. Клопат пра ўнука на сябе прыйшлося браць 90‑гадоваму дзядулю.
Пасля вывазу Ларыса атрымала ў Літве гуманітарную візу на год. Афіцыйны запыт аб прававым статусе і праве пра яе вяртанне на радзіму беларускія органы ігнаруюць.
24 лютага ў Камітэце ААН па ліквідацыі дыскрымінацыі ў адносінах да жанчын зарэгістравалі скаргу, у якой, паводле слоў Судаленкі, было пастаўлена пытанне пра тое, ці можа дзяржава распараджацца лёсам сваіх грамадзян як прадметам палітычных дамоўленасцяў і называць выгнанне «вызваленнем»?
«Бо калі прымусовае выгнанне становіцца механізмам — гэта пагроза для кожнага», — напісаў праваабаронца.
Каментары