Пуцін аддаў Венгрыі двух украінскіх палонных з венгерскім грамадзянствам. МЗС Украіны: Гэта цынічны піяр
Прэзідэнт Расіі Уладзімір Пуцін паабяцаў перадаць міністру замежных спраў Венгрыі Петэру Сіярта двух ваеннапалонных украінскіх вайскоўцаў, якія маюць венгерскае грамадзянства. Гэта адбылося падчас сустрэчы Сіярта з Пуціным у Маскве, піша «Украінская праўда».
Як паведамляецца, падчас сустрэчы Пуцін адзначыў, што пытанне пра гэтых палонных з ім раней абмяркоўваў у тэлефоннай размове прэм’ер-міністр Венгрыі Віктар Орбан. Пасля гэтага ён нібыта і прыняў рашэнне вызваліць гэтых двух чалавек і дазволіць Сіярта забраць іх з сабой у Венгрыю тым жа самалётам, якім той прыляцеў у Маскву.
Раней Сіярта заяўляў пра выклік украінскага пасла ў сувязі з абвінавачаннямі ў нібыта прымусовай мабілізацыі ва Украіне венграў. Акрамя таго, ён выказваўся ў падтрымку нелегальнай перапраўкі ўкраінскіх мужчын праз мяжу, сцвярджаючы, што мабілізацыя ва Украіне ўскладняе заканчэнне вайны, распачатай Расіяй.
У Міністэрстве замежных спраў Украіны неадкладна адрэагавалі на заяву пра пуцінскую пастанову.
У ведамстве паведамілі, што ўкраінскі бок не атрымаў афіцыйнай інфармацыі пра тое, каго менавіта вызвалілі з расійскага палону. У сувязі з гэтым у МЗС плануюць запрасіць часовага паверанага ў справах Венгрыі, каб атрымаць пацверджаныя звесткі. Таксама Украіна накіруе запыт аб доступе да гэтых асоб.
Таксама ў МЗС Украіны падкрэслілі, што вяртанне людзей з палону з’яўляецца для краіны прыярытэтам. У той жа час там адзначылі, што Масква і Будапешт ужо не ўпершыню выкарыстоўваюць адчувальнае пытанне ваеннапалонных у палітычных мэтах. Ва ўкраінскім МЗС назвалі непрымальным, што вызваленне людзей становіцца часткай перадвыбарчай кампаніі Віктара Орбана або элементам палітычных адносін з Крамлём.
Украіна таксама асудзіла спробы выкарыстоўваць тэму этнічнай прыналежнасці ўкраінскіх вайскоўцаў у палітычных заявах з венгерскага боку.
У МЗС Украіны падкрэслілі:
«Сапраўдныя гуманітарныя намаганні, якія прыкладаюць тыя дзяржавы свету, што шчыра дапамагаюць Украіне вызваляць людзей з палону і абараняць жыццё, ніколі не суправаджаюцца такім цынічным піярам і палітызацыяй. Важна, каб жыццё мела найвышэйшую каштоўнасць».
Орбан напісаў Зяленскаму адкрыты ліст
У Венгрыі апазіцыйная Орбану партыя рэкордна павялічыла адрыў перад выбарамі
Венгрыя не разблакуе прыняцце 20‑га пакета санкцый да аднаўлення працы трубаправода «Дружба»
Міністр замежных спраў Венгрыі назваў умову, пры якой краіна падтрымае выдачу Украіне 90 млрд еўра
Каментары